Shillong, Jymmang, 04: Ka Joint Action Committee ki Khun ki Hajar ka Hima Sohïongg ki la phah ïa ka shithi pynkynmaw ïa u Chief Executive Member (CEM) jong ka Khasi Hills Autonomous District Council (KHADC) ban pynhiar khet ïa u Bah Bashemphang Thabah ka kam Lyngdoh jong ka Hima Sohïong.
Ha ka dorkhas ba la soi da u Chairman u Bah Purningstar Shabong bad u General Secretary u Bah Machkupar Thabah, la ong, “ka JAC ki Khun ki Hajar ka Hima Sohïongg sa shisien ka pynkynmaw halor ka shithi kaba la phah ha ka 1 tarik Nohprah, 2021 halor ka jingdawa ban weng noh ïa u Bah Bashemphang Thabah na ka khet Lyngdoh jong ka Hima Sohïongg halor ki kam be-aiñ be-riti jong u kaba ngi ladep ujor sha ka KHADC bad kumjuh ruh ha ka shithi kaba 11 tarik, Lber, 2022.”
“Na ka bynta ka jingïaid beit ïaid ryntih jong ka synshar ka khadar trai ri trai muluk hapoh ka Hima bad ka khyndew ka shyiap jong ka Hima bad kumjuh ruh na kabynta ka jingpyntreikam hok ïa ka United Khasi Jaiñtia Hills Autonomous District (Appointment and Succession of Chiefs and Headmen) Acts, 1959, ngi pynkynmaw, namarkata, ba phi dei ban weng noh ïa u Bashemphang Thabah na ka Khet Lyngdoh jong ka Hima Sohïongg hapoh hynñiew sngi naduh ba phi la ïoh pdiang ïa kane ka shithi,” ong ka dorkhas na ka JAC.
“Ngi sngewsih ban ïohi ïa ka jingtlot treikam jong u (Bashemphang Thabah) kum u nongsynshar kaba la thad lyngkrang ïa ka ijot jong ka Hima baroh kawei. Kata, ba um lah shuh ban tehlakam ïa ki Lyngdoh Raid, ki Myntri bad Sirdarship ki ïaid laitlan katba mon, kren katba ki mon, treikam katba ki mon. Kaba thew u la ailad ïa ki ban leh kumta tang ban neh ka shuki jong u,” la kynnoh ka JAC.
“Ka JAC ka kren shai ba phi dei ban weng noh shisyndon na ka khet khlem da pynslem shuh. Lym kumta ka JAC bad ki khun ki hajar jong ka Hima Sohïongg kan sa shim da ka sienjam kaba kham tyngeh,” la byrngem ka JAC.
Dang shen ki dkhot ka JAC ki la tur paidbah sha Ophis treikam jong ka District Council ban dawa pynhiar khet ïa u Bah Bashemphang Thabah bad ha kane ka sngi ki la jynrat ruh ïa ka khyrdop nar jong ka Council da kaba kynnoh ba u CEM u Bah TW Chyne um shym la shimkhia satia ïa ka jingdawa.
