Jowai, Naitung, 12: Ka Federation of Khasi Jaiñtia & Garo People (FKJGP) Jaiñtia Hills bad ka Khasi Students’ Union (KSU) Jaiñtia Hills hynnin ka sngi kila leit ban ïa kynduh ïa u Deputy Commissioner ka West Jaiñtia Hills District bah B.S. Sohliya, halor ka jingmih jong ka jingïakren ïasuk jong ki ar tylli ki bor District kata ka West Jaiñtia Hills District bad Karbi Anglong Autonomous Council (KAAC) hadien jingmih huri hura hapdeng ki ar jaitbynriew kata ki Pnar bad Karbi.
Hadien ka jingïakynduh ïa u DC mynta ka sngi 11 tarik na ka liang u President ka FKJGP uba dei ruh u Waheh Shnong ka Namdong ma D.S. War ha ka jingkren ha ki lad pathai khubor ula ong ha kine ki taïew ba la dep ki paidbah khappud ki dang don hapdeng ka jingeh ban leit rep leit riang sha ki lyngkha trei jong ki.
Kum ka seng ka la pynkynmaw ha u DC ha kaba ïadei bad ka jingïalang ïakren ïasuk kaba la dep long ha ka 23 tarik u March, 2023 hapdeng ki ar District kaba kynthup naduh ki Bordor Magistrate, ki nongïalam shnong bad ki nongïalam sengbhalang kumjuh.
Hynrei haduh mynta ym pat don kano kano ka dak ka shim kaba mih na kane ka rai jong ka jingïakynduh ki ar District na ka bynta ban wanrah ïa ka jingshongsuk shong shngaiñ, da kaba ong ka jingpynslem ïa kane kala wanrah jingeh pynbna ïa ki nongshong shnong ha khappud.
Shuh shuh ula ïathuh ba na ka liang u DC ula pyntip ba ula dep ïakren ïa kane bad ki bor ka KAAC bad haka juh ka por kan don ka jingïakren kunjuh bad ki nongïalam shnong ban shah noh ïaka rung ka mih hapdeng kine ki ar jaitbynriew kumba long ha ki por mynshwa.
