Shillong, Jylliew 04 : U President ka seng A’chik Holistic Awakening Movement (AHAM) u Prince Ch Momin ula thoh sha u Myntri Rangbah ka jylla Conrad Sangma ban pynkynmaw halor ka jingdawa ban pynlong ïa ka Tura kum ka Nongbah Tlang ka Meghalaya.
Ka shithi ka ong “Ka AHAM ka kwah ban pynkynmaw haba ïadei bad ka jingdonkam ban pynkylla noh ïa ka Tura kum ka nongbah tlang jong ka jylla namar ka Tura ka long ka nongbah ba donkam bha hapoh ka jylla bad ïa kane ka jingdawa la dep ban phah ruh sha u Lat ka jylla hynrei haduh mynta ka sorkar kam pat jubab”.
“Phi tip ba kane ka jingdawa kadei kaba la slem na ka bynta ki nongshong shnong ka Tura bad ka thaiñ Garo baroh kawei bad kane ka jingdawa ka pynkynmaw ha ki por mynshwa haba ka la don ka jingïateh hapdeng ki nongïalam ka jylla kata Khasi, Garo bad Jaintia haka por ba ïakhih jylla la ka jong ban pynlong ïa ka Tura kum kawei na ki nongbah ka Meghalaya kata naduh u bnai Risaw haduh Lber bad Shillong naduh Iaiong haduh Nailur. Haduh mynta ïa kane ka jingïateh khlem pat burom bad kane ka pynduhnong ïaki jaidbynriew Garo bad ka thaiñ baroh kawei “.
Ki jaidbynriew Garos ki ïapher na ki Khasis/Jaintias bad ka thong ban ïakhlad na ka Assam ka dei hi ban pynneh ïa ka jinglong kyrpang bad kane ka jingpynlong ïa ka Shillong kum ka nongbah ka Meghalaya ka wanrah ka jingmyntoi tang ïa ki jaidbynriew Khasi/Jaintia namar bun ki kam pynroi ha ki bun ki liang ki leit lut tang ha rilum Khasi/Jaintia.
Ka jingsynshar ka ba biang tam kad ei lyngba ka jingsam ïa ka bor synshar ha baroh ki liang bad lyngba ka jingpynkylla ïa ka Tura kum ka nongbah tlang ka Meghalaya kan wanrah shibun ki jingmyntoi ïa ka rilum Garo baroh kawei.
Ka jingsynshar ka ba biang ka dei daka ba pynïajan bad ki paidbah.
Ka jingpynkylla ïaka Tura kum ka nongbah kan khring ïa ki briew lane ki kompeni ban seng kam ha rilum Garo bad kane kan kyntiew ïa ka ïoh ka kot na ka bynta baroh lang.
Ka jingsam bor synshar kan wanrah ka jingshngaiñ bad ka jingshaniah hapdeng kito kiba don haka sorkar bad ki paidbah.
Ka jingpynkylla ïa ka Tura kum ka Nongbah kan peit bniah ïa ka jingsam ïa ki kam pynroi hapdeng ka Khasi/Jaintia bad Garo hills.
Ka nongbah Shillong ka jngai palat iaki paidbah ka rilum Garo hills bad kane ka buh jingeh ïa ki paidbah ka thaiñ ban leit donkam khamtam ha kaba ïadei bad ki jingdonkam ha ka roi ka par bad ka ïoh ka kot.
Ka jingdon artylli ki nongbah ka don ruh ha kiwei ki jylla ka ri India na ka bynta ban rah ka jingshynshar ka ba bha ïa baroh lang.
Kiwei ki jylla ki ba don artylli ki nongbah ki kynthup ka Jammu & Kashmir, Himachal Pradesh, Andhra Pradesh bad ka Meghalaya ka dei ruh ban bud nuksa ïa kane.
