Pynkynmaw biang u Rakkam ïa u Myntri Rangbah halor ka lynti rel ban pynpoi sha Baghmara

Shillong, Naitung 21 : U Myntri ka tnad Pule Puthi ba dei ruh u MLA jong ka Rongara – Siju constituency, u Rakkam A Sangma ha ka sngi Nyngkong u la pynkynmaw biang da ka jingthoh ia u Myntri Rangbah na ka bynta ban pynpoi ïa ka lynti rel haduh Baghmara.
Haba kren bad ki lad pathai khubor, u Rakkam u la ong ba lada lah ban pynpoi ïa ka lynti rel haduh katei ka thain kan ïarap bha ïa ka kamai kajih bad ka ïoh ka kot jong ki nongshong shnong nalor ba kan ïarap ruh wat ha ka ïohkam ïohjam.
“Nga la dep ban ai biang da ka dorkhas sha u Myntri Rangbah ka jylla, Conrad K Sangma ban pynkynmaw bad kyrpad ïa u na ka bynta ban bteng shuh ïa ka lynti rel na Mendipathar sha Baghmara lyngba ka Nongalbibra lane lyngba ka Tura, Tikrikilla, Dalu lane na kano kano ka lynti,” u la ong.
Shuh shuh u ong ruh ba u Myntri Rangbah u sngewthuh bha ïa ka jingmyntoi jong kane ka projek na ka bynta ka thain bad kumta un sa rah hi dalade ban ïa kren ïa kane ka mat bad ka sorkar pdeng.
Katkum ka jingong jong u Myntri, ka jingpoi jong ka lynti rel sha Baghmara kan ïarap wat ban pynïasoh ia ki iew ki hat ha Bangladesh bad sha kiwei ruh ki jaka bad da kane ka lynti kan ïarap ia ka jylla ban pynseisoh lut ïa ki jingmih kiba ka jylla ka don.
Da kaba ong ba ka lynti rel kan pynsuk ha ka leit ka wan, nangta ha ka ïoh ka kot bad ruh ha ka ïohkam ïohjam, u Myntri u ong ruh ba kane kan ïarap wat ban kyntiew ïa ki kam jngohkai pyrthei, nangta ki karkhana bad ruh kan pynduna ïa ka jingkhmih lynti eh tang ha ki kam sorkar.