Ka jingleit ïasoh NPP jong u Bah Ronnie V Lyngdoh, ka la pynkyndit thret ïa ki riewieid Congress bad kumjuh ïa ki pyrman saiñ pyrthei jong ka jylla hi baroh kawei.
Ha ka por ba ki lai ngut ki MLA Congress, ki leit ïasoh NPP, ha u snem 2024; u Bah Ronnie, u shong marwei hi triang ha katei ka seng, hynrei ha kane ka kynti, kaba ym don ba mutdur satia, u leit kynthih syndon jlang sha katei ka seng.
Kumta ka mih ka jingkylli, ba u Bah Ronnie, u kwah ïa ka myntoi shimet lane u la i duh jingkyrmen ïa ka lashai jong ka seng Congress ha ka jylla, lane ïoh lehse, ka dei pynban, ba ki paidbah kim ai thiah ai shong ïa u, da ki jingdawa kiba hajar jait hajar skit.
Ki daw ki lah ban kham bun, hynrei lada u artatien ïa ka seng Congress ruh, kata kam da don jingthew eh kaba biang, namar ba ka seng Congress, kam shym don jingkylla eiei ruh em ha kane ka shisnem, naduh ba phet ki lai ngut ki MLA bad mynta ba phet u Bah Ronnie bad kaba ngi lah ban ong, ha kawei ka kyntien “khluit ruh em, pjah ruh em”.
Lada ïakren pat ïa ka jinglalot than jong ki paidbah, da kaba ki leit dawa lut ïa manla ki jingdonkam na ki MLA, kata ka long, sa kawei pat ka mat bad katei ka dei kaba buh jingeh ïa uno uno u MLA/MDC ba kin don ha ka liang pyrshah, namar ba kim ïoh kamai tam satia, nalor ka tulop jong ki bad kane ka dei ka mat, kaba u paidbah paidlang ka jylla, un hap pyrkhat sani bha ïa la ka jong ka jinglong jingim, namar ba lada leit shim dawai ruh wad MLA/MDC, lada long jingïaseng ruh, wad nongmihkhmat, lada ïap briew ruh shu wad beit ban ïoh pisa bad kane ka jingmlien, ka la pynjot ïa ka saiñ pyrthei jong ka jylla.
Kumba ka long mynta, ngim don shuh ki nongïalam Khasi, kiba jrong rynïeng bad kiba nud ban kdew ïa ki jingdkoh jong ka sorkar jylla, kum ka kyrdan jong U Mukul Sangma, u Nongïalam na Garo hills bad kumta ka khmat jong uba bun, ka phai sa tang ïa u Bah Ardent Basaiawmoit, nongïalam jong ka VPP, ba un long ka shkor bad ka khmat jong kiba bun, kiba ïohi, ïa ki jingdkoh jong kane ka sorkar MDA.
U Conrad Sangma, ula pyni, ïa la ka jong ka bor lahduh, da kaba u khylliap ïa ki liang pyrshah, hynrei u hap ban kynmaw, ba ha ka synshar paidbah, ka rai kut, kam dei ha kitei ki MLA kyntiap seng, hynrei ka shong ruh ha ka sur jong uba bun balang bad ngim dei ban klet, ba U Sangma, ula pynjot thiaw ïa ka pali synshar jong ka Congress ha u snem 2018, hynrei um shym la lah ban jynrat naduh tyllong ïa ka bor jong ka seng Congress, ha kaba ka dang jop ïa 4 ngut ki MLA ha u snem 2023.
Mynta u snem 2026, ula jan wan bad ka thma politik, ka la sdang khie im, hynrei ngim dei ruh ban klet, ba ka seng NPP, ha u snem 2013, ka don tang arngut ki MLA, lait noh U Conrad Sangma, uba rem ïa ka elekshon ha katei ka sien.
Lah ban ong ba kane ka jingleit pynïasoh jong u sha ka seng NPP kan lah ban long ba u la sngew duh jingkyrmen ha ka seng Congress kaba la ïohi ba na ka por sha ka por kane ka seng ka la sdang ban hiar, hynrei kaei kaba ngi donkam mynta kan long ha ka elekshon kaba dang wan ha kine ki snem ha kaba lehse la ka seng ka Congress kan dang lah ne em ban ïeng rasong biang ha kine ki snem ban wan bad kane ruh kan shong ha ka rai jong ki paidbah.
