Shillong, Nohprah 19 : Ka Kynhun Myntri kaba la ïa kynduh ha ka Sngi Thohdieng ka la mynjur bad pynskhem ïa ka jingpynkylla ïa ka aiñ shna ïing (Meghalaya Building Bylaws) da kaba buh kyndon ba kino kino ki jingtei ïing ha ki jaka ba palat ïa ka 10,000 sq.m shaneng ki dei ban ïoh ïa ka Green Building Certification (GBC).
U Myntri Rangbah ka jylla u Conrad K Sangma haba kren sha ki lad pathai khubor u la ong wat la ka jingpynkylla ka long kaba rit hynrei kan wanrah pat shibun ki jingmyntoi.
U la ong “ Ka kynhun myntri ka la mynjur ïa kane ka jingpynkylla ïa kane ka aiñ tei ïing khnang ba nangne shakhmat kino kino ki jingtei kiba heh ki dei ban ïoh shwa ia ka GBC bad mynta kino kino ki jingtei kiba heh kin hap ïoh beit ia kane ka Certificate Green Building”.
U la ïathuh wat ka ïing ophis jongka Secretariat ba thymmai ha Mawdiang diang ruh ka dei kaba la ïoh ïa kane ka GBC bad la tip ïa ka kum ka Green Building.
