Pynkylla ka MSERC ïa ka bai ding elektrik, kiew jong ki paidbah, hiar jong ki Karkhana

Shillong, Risaw 29: Shibun ki jingkylli ki la mih ha kaba ïadei bad ka jingpynkylla jong ka Meghalaya State Electricity Regulatory Commission (MSERC) ha kaba ïadei bad ka dor jong ka bai ding elektrik ha ka jylla.
Ki khubor ba la ïoh ki ïathuh ba ha ka 28 tarik mynta u bnai ka MSERC, hadien ba la shimti ïa ka kam Chairman jong ka Commission da u Chandan Kumar Mondol, la pynkylla biang ïa ka dor jong ka bai ding elektrik kaba dang dep pynkylla dang ha u bnai ïaïong mynta ka snem.
Katkum ka khubor ba la ïoh la ïathuh ba ka jingpynkylla ka long, ba la pynkiew ïa ka dor ba dei ban siew ki paidbah ne domestic consumer bad la pynhiar pat ïa ka dor badei ban siew ki Karkhana.
Ka khubor ka ong ba ki paidbah ne domestic consumer kidei ban siew ia ka ka fixed rate ka long 90 tyngka shi kilowatt, kaba la pynkiew la pynkiew sha ka 80 tyngka shi kilowatt shi bnai. Nangta ïa ka energy charge pat, ki paidbah ki hap ban siew 5.55 tyngka na ka bynta ki 100 unit, bad hadien kane na ka bynta ki 100 unit shaneng pat ki hap ban siew 5.65 tyngka shi kilowatt.
Na ka bynta ki Karkhana pat ka dor kaba kidei ban siew ka long ka fixed charge ka long 310 tyngka shi kilowatt shi bnai, katba ka energy charge pat ka long 6.51 tyngka shi kilowatt shi bnai. Katba ha u snem 2023-2024 pat ka dor ka long 7.80 tyngka shi Kilowatt, kaba mut ka don ka jingpynhiar kaba 1.29 tyngka shi kilowatt.
Ha ka por ba long Chairman u Bah PW Ingty ïa ka MCERC, ka la mynjur ïa ka jingpynhiar dor ïa ka dor jong ka bai elektrik ki paidbah, kata na ka bynta u snem 2024-’25.
Shuh shuh na ka bynta u snem 2024-’25, ka dor ba dei ban siew ki paidbah ia ka bai elektrik la mynjur ba kan long 4 tyngka shi kilowatt na ka bynta ki 100 unit. Ha u snem 2023-2024 ka long 4.40 tyngka shi kilowatt.
Na bynta ki 100 units shaneng pat ka dor ka la hiar ha u 2024-2025 sha ka 4.50 tynka shi kilowatt, na ka 5 tyngka shi kilowatt ha u snem 2023-2024.
Na kitei ki dor haneng katkum ka jingpynkylla ïa ka dor ba la pynmih ha ka 28 tarik u Risaw 2024, ka paw ba la pynkiew ïa ka dor jingsiew ki paidbah, katba la pynhiar pat ïa ka jingsiew ki Karkhana.