Pynkylla ka MCA ïa ka kynhun U-23 na ka bynta ka jingïakhun ba lai jong ka Col CK Nayudu Trophy

Shillong, Risaw 25: Ka senior men’s selection committee jong ka Meghalaya Cricket Association [MCA] ka la pynmih ïa ka thup kyrteng ba la pynthymmai jong ki 15 ngut ki rangïalehkai ka kynhun na bynta ka jingïakhun kaba lai ha ka U-23 men’s Col CK Nayudu Trophy 2024-25 pyrshah ïa ka Himachal Pradesh.
Kane ka jingïakhun kaba bteng bun sngi (multi-day) kan sdang naduh ka 27 tarik Risaw bad yn pynlong da ka Himachal Pradesh Cricket Association ha Nadaun.
Ki jing pynkylla ïa ka kynhun na bynta katei ka jingïakhun ka long ban kynthup ïa u Banialam Mylliemngap bad u Thunun Marak ha jaka jong u Navin Kumar bad u Sachin Kumar.
Ka Meghalaya ka la kiew kyrdan sha ka elite hadien ba ka la wan ba-ar ha ka Plate Group hadien ka Nagaland ha u snem 2023-24. Ka Meghalaya ka la lah ban jop lut ïa baroh 6 tylli ki jingïakhun ha ka lynti ban rung sha ka wat ïakhun namlahduh hynrei kam shym la lah satia ban pynliem ïa ka Nagaland ha ka jingïakhun ïa ka final.
Mynta ka samoi, ka Meghalaya haduh mynta ka la shah rem ha ki ar tylli ki jingïalehkai ba nyngkong, ha kaba ka la rem da shi inning bad 129 ron pyrshah ïa ka Punjab bad da shi inning bad 93 ron ha ka Andhra Pradesh.
U Kevin Christopher u la tied ïa ka spah ron shiteng (half-century) ha baroh ar tylli ki jingïalehkai, katba u Swastic Chettri u la shah pynhap noh shiteng lynti ban kynjoh ïa ka half-century, kata da tang 49 ron ha ka jingïakhun pyrshah ïa ka Andhra Pradesh.
Haduh mynta, u Abhishek Kumar u la long u rangïalehkai ba seisoh tam jong ka Meghalaya, da kaba khur san wiket, kynthup ïa ka saw wiket (4/71) kiba u la khur ha ka jingïakhun pyrshah ïa ka Punjab.
Haba phai pat sha ka Himachal Pradesh, kane ka kynhun ka la don ha tmier ban shah rem hynrei ka la lah ban ïakhaid ha ka jingïakhun kaba nyngkong pyrshah ïa ka Rajasthan ha shuwa ba kan mad namrem ha ka Vidarbha da hynñiew wiket ha ka jingïakhun kaba ar.
Ka kynhun Meghalaya ba la pynkhreh ban ïakhun pyrshah ïa ka Himachal Pradesh ki long: Kevin S Christopher (C), Manish Sharma (V-C), Aman Kumar, Avinash Rai, Abhishek Kumar, Gulgul Sangma, Gavineal J Marpna, Bipin Kr Ray, Josiah Momin, Joydeepan Deb, Banialam Mylliemngap, Purav Agarwal, PM Santhosh, Thunun Marak (WK), Swastic Chettri.
Standbys: Navin Kumar, Kush Agarwal, Rohit Kr Yadav, Bharat Gurung, Raghav Magotra.
Support staff: Neetesh Sharma (Head Coach), Synrapsing Riahtam (Assistant Coach), Emidao Dhar (Physio), Skhembor Khongbtep (Trainer), Chuba R Marak (Manager).