Pynkutnoh ka Ïingkashari ïa ka mukotduma PIL halor ka kam pynkynriah kiba die madan

Shillong, Naitung 28: Ka Ïingkashari Meghalaya High Court ka la pynkut noh ïa ka mukotduma Public Interest Litigation (PIL) ha kaba ïadei bad ka jingpynkynriah ïa ki nongshong dukan madan ba la ïoh laisen sha ka jaka shong dukan madan ba la buh da ka Sorkar ha ka thaiñ Khyndailad.
La ong ba kane ka la mih hadien ba la pyntip sha ka Ïingkashari ba ka Sorkar ka la pyndep ïa ka jingpynkynriah ïa ki nongshong dukan madan hapoh ka tarik ba la buh ka 22 tarik Naitung mynta u snem.
“Naba ïa ka thong la lah ban pyndep, ym don eiei shuh ban shong bishar ha kane ka aplikeshon,” pynpaw ka Division Bench ba kynthup ïa u Chief Justice IP Mukerji bad u Justice W Diengdoh ha ka hukum ba la pynmih ha ka sngi Nyngkong, haba pynwai noh ïa ka MC (PIL) No.2 ka snem 2025.
“Ka kam jong kane ka aplikeshon ka long na ka bynta ban pynkylla ïa ka hukum ba ha shuwa jong ngi kaba ai katto katne por ïa ki nongshong dukan madan ba don licence ba kin shong dukan ha Police Bazaar. La pyntip ba kane ka jingbuh por ka la ktah ïa ka kamai kajih ka jong ki. Namarkata, ngi la pynkiew ïa ka por ba ailad ïa ki ban shong dukan ha ka thaiñ,” ong ka Ïingbishar.
U nongïasaid jong ki nongmudui ula pynpaw ïa ka jingsngewkhia halor ka jingpynduh noh ka bym shonghok ïa ki licence jong ki katto katne ki nongshong dukan madan, kaba la khang lad ïa ki ban ïoh jaka shawei.
Na ka liang ka Ïingkashari ka la rai ban sa bishar ïa kiwei pat ki kam ba mih thymmai, kynthup ka jingpynkynriah ïa ki nongshong dukan madan na ki jaka ba bun paidbah bad ka jingkyndang ïa ki nongshong dukan madan ki bym don licence, ha ka PIL ba pura ha ka 5 tarik Nailar, 2025.
Ka hukum ka ong, “Ki don katto katne ki kam ba mih thymmai kum kaba la pynsngew da u Yobin haneng bad ka jingkylli halor ka jingpynkynriah ïa ki nongshong dukan madan ba la don laisen na ki jaka ba bun briew sha ki jaka ba buh da ka Sorkar bad ka jingkyndang ïa ki nongshong dukan madan bym pat ïoh licence na kito ki jaka nalor kiwei kiwei, yn sa shong bishar ynda ngi la khot bishar biang ïa ka PIL ha ka 5 tarik Nailar, 2025.”