Nongpoh, Rymphang 01: Uwei u samla pule jong ka skulbah USTM ha Ri Bhoi District, la kynnoh ba u la pynkut noh ïa la ka jingim, da kaba phasi ïa lade hapoh ka Kamra Hostel kaba u sah ha katei ka skulbah, ha kaba la lap da u nongpeit Hostal bad ki nongtrei katei ka skulbah.
Une u samla uba la shim ïa la ka jingim da kaba phasi ïa lade, la tip kyrteng kum u Sahil Ahmed Talukdar ha ka rta kaba 19 snem bad u ba dang pule ïa ka B. Pharm ha katei ka skulbah na ka shnong Hojai jong ka jylla Assam.
Kumba la ioh lum jingtip na ki Pulit ka Ri Bhoi, la ong ba une u samla, u dei uba sah Hostel ha katei ka skulbah USTM bad ïa kane ka jingshim jong u, ïa la ka jingim ha u tyllai phasi la lap da u nongpeit katei ka Hostel bad ki nongtrei katei ka skulbah, kaba u la pynkut ïa lade ban sdien phasi da ka pyngkha da kaba pyndonkam ïa ka jaiñ Gamcha.
La ong ruh ba kane ka jingjia, ka la jia ha janmiet Sngi Thohdieng ha ka por 8 baje ei ei ba ki Pulit ki la ioh jingtip na katei ka skulbah bad ki Pulit ka Khanapara ki la leit mardor ban pynlong ïa ka jingtohkit halor kane ka jingjia.
Ka tyllong khubor, na ki Pulit la ong ba haduh mynta kim pat tip ïa ka daw kaba thikna ba utei u samla u la pynkut ïa la ka jingim ha u tyllai phasi bad na ka liang ki pulit ruh ki dang pynlong ïa ka jingtohkit kaba bniah ban tip ïa ka daw tynrai jong kane ka jingjia.
Shuh shuh, la ong ruh hadien ba mynta ka sngi la pynlong ïa ka jingtohkit bad da ka jingkyrpad kiba haïing ban pynlait na ka postmortem examination, ki Pulit ki la aiti noh ïa ka met jong une u samla sha kiba haïing ba ki pyndep ïa ka met ba dangsah jongu, hadien ba la ioh bor ban nym leh ïa ka postmortem examination, ong ka tyllong khubor na ki Pulit ka Ri Bhoi.
