Shillong, Jylliew 05 : U Myntri Kampohiing barim ka Jylla ba dei ruh u MLA barim ka Sohïong Bah HDR Lyngdoh ha ka sngi Saitjaiñ u la rai ban kynthih noh sha ka UDP ban pynkhreh na bynta ka elekshon MLA kaban long ha u 2023.
Haba pyntip ïa katei ka rai, u Bah HDR u la ïathuh ba ha katei ka jingïalang kaba la poi baroh 40 tylli ki primary unit jong ka Sohïong Block Congress da kawei ka sur ki la rai ban iehnoh ïa ka Congress ban pynïasoh tylli noh sha ka UDP.
“Baroh ki unit ki la pynbor ïanga ba nga dei ban iehnoh ïa ka Congress bad ban ïakhun noh na ka UDP ha ka elekshon MLA kaban long ha u snem ban wan,” ong u Bah HDR.
Katkum ka jingïathuh jong u, katei ka rai ba ki nongïalam jong ka party Congress na Sohïong ki shim kadei namar ki ïohi ba ka Congress kam don jingkyrmen shuh ha kane ka elekshon ban wan.
“Na ka liang jongnga, nga la pdiang ïa ka rai kaba ki nongkyrshan ki tyrwa namar ha kaba khatduh dei ma ki hi kiba ju pynjop ïanga bad ruh kiban pynjop ïanga ha kane ka elekshon ban wan,” bynrap shuh shuh utei u MLA barim.
Ki jingtip ba la ïohlum, la ïathuh ba ïa katei ka rai ba ki paidbah ki shim kin sa pyntip pat sha ki bor bahalor jong ka UDP ban leh pat ïa kaba donkam.
Lah ban kdew hangne, ba u Bah HDR Lyngdoh un hap ban ïakhun pyrshah ïa u Bah Samlin Malngiang ba dei ruh u MLA ba mynta jong katei ka thaiñ.
