Mawkyrwat, Naiwieng 05 : Ka St Merry’s Higher Secondary School Rangblang kaba hapoh jong ka South West Khasi Hills District ha ka jingphuh jingphieng ka la ïoh ban pynhap pyrda noh ïa ka jingrakhe lehkmen jong ka Jubilee Ksiar ne ka jingdap 50 snem jong ka jingshakri jong ka ha ka liang ban ai jinghikai ha ka jingnang jingstad ïa ki khun kiba ha kane ka dong ka thaiñ kumjuh ruh ha kaba ïa dei ban wanrah ka jingshai na ka bynta ka jingshakri ïa U Blei.
Lah ban kdew ba ha kane ka jingpynkut ïa ka Jubilee Ksiar jong ka jingdap 50 snem jong ka la long kongsan da u bah Methodios Dkhar uba dei MLA ka Mawshynrut Constituency uba bat ruh kum u Myntri Sorkar ba peit ïa ka Food Civil Supplies & Consumer Affairs Department, ha ryngkat ka jingdonlang u bah Carbriel Wahlang uba dei u MLA jong ka Nongstoin Constituency kum u symbud kongsan bad u bah Renikton Lyngdoh Tongkhar u MLA ka Mawkyrwat Constituency, u Fr. Edmon Lakra uba dei u Principal jong ka St. Merry Higher Secodnar School, Rangblang, u Fr. John Zosiama, Salesian Provincial of Shillong Province, u bah Carnes Sohshang, MDC barim, ki Father, ki sister ki Ophisar sorkar ki riew rangbah ka thain kiba la shah khot sngewbha ha kane ka sngi.
U bah Methodios Dkhar uba dei MLA ka Mawshynrut Constituency uba bat ruh kum u Myntri Sorkar ba peit ïa ka Food Civil Supplies & Consumer Affairs Department haba kren ha kane ka sngi ula pynpaw ka jingsngewkmen ban ïa don bynta ha kum kane ka sngi kyrpang namar ba ma u u dei na kane hi ka thaiñ. Ym tangkata, ha ka jingkren jong u u ai mynsiem shibun ïa ki khynnah skul da ki kyntien jingkyrkhu kyrdoh ba kum ki khynnah skul ki dei ban kiar na kiei kiei kiba sniew kiba ïalam bakla ïa ka jingim jong ki kum ki khynnah skul hynrei ki dei ban long kiba trei minot bad trei shitom khnang ba kin poi ha kliar jong ka thong.
Hadien ka jingkren, u la ai sngewbha ruh da ki tiar ïalehkai bad kumjuh ka song pisa sha ka St. Merry’s Higher Secondary School, Rangblang.
Katba ha ka jingkren jong u bah Renikton Lyngdoh Tongkhar kum u Nongmikhmat jong ka Mawkyrwat Constituency ula pynbna ban mang pisa kyrpang T. 5 lak tyngka na ka MLA Skhim ha kine ki snem ban wan ban noh synñiang na ka bynta ki jingdonkam jong kane ka skul.
Shuh shuh na ka liang ki khynnah skul kiba rim ne ka Association of Donbosco Past Pupils St. Merry’s Rangblang ki la ïoh ban plie pyrda ïa u Mawnongrim na ka bynta ban jingsah kynmaw ban shna ïa ka jaka leit shabar jong ki khynnah skul ne ka Toilet ha ka mang tyngka kaba T. 9 lak tyngka.
Haba kut jong ka jingrakhe, u bah Renikton Lyngdoh Tongkhar u la shim ïa ka bynta ban pynhap ïa ka lama kum ka dak ka jingpynkut noh ïa ka Golden Jubilee.
La pynshit pynshngaiñ bad pyn-i-phuh i-phieng ïa kane ka program da ki jingrwai jingshad Tynrai na ki Khynnah skul ha ryngkat da ka jingsakhi da ki paidbah jong ka thaiñ.
