Pynkut noh ka HC ïa ka PIL ba kynnoh tih mawshun beaiñ ka ACIL ha East Jaiñtia Hills

Shillong, Nailar, 01: Ka Ïingbishar Meghalaya High Court ka la pynkut noh ïa ka Public Interest Litigation (PIL) kaba ïadei bad ki jingkynnoh tih mawshun beaiñ da ka Amrit Cement Industries Limited ha East Jaiñtia Hills District.
Ka Division Bench kaba kynthup ïa u Chief Justice IP Mukerji bad u Justice W Diengdoh ha ka rai ba la pynmih ha ka sngi Thohdieng ka la bthah ïa ka Sorkar Jylla ban peitngor bha bad ban pynthikna ba ka kompeni ka dei ban bud ryntih ïa ki kyndon tih dewïong jong ka katkum ka laisen.
“Halor ki jingai jingmut ba ïaleh pyrshah, ka kaiphod jong ka Sorkar bad ka nongrim ba la shim da u Chief Secretary, ngi bthah ba ka Sorkar Jylla kan peitngor bha ban pynthikna ba ïa ka laisen ba la ai sha u nongshah mudui No.9 (Amrit Cement Industries Limited) un pyndonkam hok bad ba kam dei shuh ban dang don bynta ha ka kam tih mawshun be-aiñ,” ka la ong.
“Shuh shuh, manla ka lai bnai u Chief Secretary ne uno uno u ophisar ba la aibor un pynmih ïa ka jingpynbna hadien ba la kut ka jingtohkit ïa kaba yn pynmih ha ka website jong ka sorkar ba u nongshah mudui No.9 u dang bteng ne um bteng shuh ban tih mawshun katkum ka laisen, na ka bynta ka jingtip jong uno uno u briew uba kwah ban tih ïa u mawshun un pynthikna ba kam dei ban don shuh ka jingtih marpoh khyndew beaiñ ha ka Jylla,” la bthah ka Bench
Ka PIL ba la ujor da u Ranjit Chandra Goswami ka la kynnoh ba ka Amrit Cement Industries Limited ka la donkti ban tih mawshun beaiñ khlem ka jingïoh jingbit kaba biang.
Ka kompeni ka la ïoh ïa ka laisen ban tih mawshun ha ka 11 tarik, Kyllalyngkot, 2023, hynrei u nongmudui u la kam ba ka la tih mawshun beaiñ shwa bad hadien ba la ïoh ïa ka laisen.
Ka Bench ka la shimkhia ïa ka kaiphod jong ka Sorkar Jylla, kaba la pyllait ïa ka Amrit Cement na ki jingkynnoh. Hynrei u nongujor u la pyrshah ïa kane ka jinglap, kaba la pynlong ïa ka Ïingbishar ban wad jingshai shuh shuh.
U Advocate General u la kyrshan tyngeh ïa kane ka rai jong ka Sorkar Jylla da kaba ong ba shwa ban ïoh ïa ka laisen ha u snem 2023, u nongshah mudui u No.9 u la thied ïa u mawshun na ki nongdie shimet ha ka Jylla. Kum kane ka jingdie ka la long kaba longaiñ.
U la pynpaw ruh ba ka mat hato lah neem ban die da ki nongtih mawshun shimet jong kane ka Jylla sha ki nongthied ha Bangladesh kaba dang ha ka ïingbishar Supreme Court.
Kata ka la long ka mat kaba pher bak-ly-bak ha kaba ïadei bad ka jingdie ïa u mawshun shabar ri da ki nongdie shimet kiba don ïa ka laisen tih marpoh khyndew. Ym don kano kano ka hukum jong ka Ïingbishar Supreme Court haduh kine ki sngi kaba tuklar ïa ka jingdie shimet ïa u mawshun.
U Advocate General u la bynrap ba u nongmudui u la leh na ka bynta ka jingmyntoi jong u nongsengkam sengjam ne u nongseng karkhana uba ïaleh pyrshah uba leh ïa kajuh ka jait kam kum u nongshah mudui No.9 bad uba kwah ban khang khyrdep ïa ka kam jong u nongshah mudui.
U la pynskhem ruh ba u nongmudui u la don naduh u snem 2023 ïa ka laisen kaba biang ban tih mawshun.
U Advocate General u la pynskhem ruh ba katkum ka jingtip jong ka Sorkar, u nongshah mudui No.9 um shym la leh ïa kano kano ka kam tih mawshun beaiñ ha kano kano ka por shwa ne hadien ba u la ïoh ïa ka laisen.
Ha kajuh ka por, ka ïingbishar ka la shimkhia ïa ka jingai jingmut ba la ai da u DK Banerjee, u Senior Advocate uba la ïasaid na ka bynta u nongshah mudui No.9.