Shillong, Naitung, 23: Ka Iingbishar Meghalaya High Court ka la pynkut noh ïa ka Public Interest Litigation (PIL) kaba ïadei bad ka jingsiew bai lutksan ïa ka jingshim jaka ha Ri Bhoi District.
Ha ka hukum kaba la pynmih ha ka sngi Balang, ka Division Bench kaba kynthup ïa u Chief Justice IP Mukerji bad u Justice W. Diengdoh ka la kheiñ ïa ka rai jong u Special Judicial Officer kum ka rai/hukum ba khatduh da kaba la bthah ba 20% na ka pisa bai lutksan ba la bat da ka Jylla kan dang bteng ban bat na ka bynta phra taiew naduh ka sngi ba la pynmih ïa ka hukum. Hadien kane ka por, yn sa pyllait ïa ka pisa sha u nongpynkynriah lada ym don hukum kaba pyrshah.
“Ngi shu pynshai bad bthah ba 20 percent na ka pisa bai lutksan kaba la bat da ka Jylla kan dang bteng ban bat haduh 8 taiew naduh kane ka tarik hadien kata yn pyllait noh sha u nongpynkynriah ba la kdew, lada ym don hukum kaba pyrshah. Ka por hapdeng ka 20 tarik, Jylliew, 2025 bad ka jingpynbna ïa kane ka hukum yn weng noh ha kaba kheiñ ïa ka por ba la buh na ka bynta kano kano ka jingujor ne jingpan jingbit ne kiwei kiwei. Ïa ka MC (PIL) No.1 jong u snem 2021 la pynkut noh,” la ka la ong.
Ïa kane ka PIL la mudui ha u snem 2021. Kane ka mukotduma ka mih na ka hukum jong ka Iingbishar Supreme Court ha u snem 2017, kaba la bthah ïa u District Judge ban rai ïa ka mat jong ka hok bailutksan na ka bynta ki jaka ba la shim ha Ri Bhoi district.
Ka Iingbishar Supreme Court ka la bthah ruh ïa u Deputy Commissioner ban peit ïa kane ka kam bad ban pynthikna ba ïa ka pisa bai lutksan yn ym aikhlem da pyrkhat sani bha.
U Special Judicial Officer, East Khasi Hills, Shillong u la pynmih ïa ka rai ha ka 20 tarik, Jylliew, 2025, da kaba ong ba ka jingsiew bailutksan ba la tyrwa kam long kaba tam palat bad la kheiñ katkum ka Right to Fair Compensation and Transparency in Land Acquisition, Rehabilitation and Resettlement Act, 2013.
