Jowai, Jymmang 13: Ka Tep Kyndait Government U.P. School Tuber Kmaishnong kala pynkut ïaka taïew lehkmen ne ‘Annual School’s Week 2022’ mynta ka sngi ha kaba u Principal ka Jaiñtia Eastern College Dr. Phervision Nongtdu ula long kum u kongsan.
La sdang ïa kane ka lehkmen naduh ka 10 tarik mynta u bnai da kaba pynlong ïa ki prokram bapher ba pher kum ka jingïalehkai sports ha ki kyrdan Junior bad Sub-Junior, la don ruh ka jingïakop Debate, Quiz, Extempore Speech bad kiwei ba la shim bynta shitrhem da ki khynnah katei ka skul wat hapdeng ka jinghap u slap.
Ha kane ka sngi la don ka jingïalang ba lyngkot ba la pynïaid da u Riquoma Rq. Laloo u Headmaster ka skul, ha kaba na ka liang u kongsan Dr. Phervision Nongtdu haba ai jingkren ula pynpaw ka jingsngewkmen ban ïadon bynta lang ha kane ka sngi da kaba kyntu jur ïa ki khynnah skul ban long kiba sumar bha ïa ka jingitynnnad ki sawdong sawkun jong ka mariang namar ka lawei ka shong ha ki khynnah ba mynta.
Ha ka juh ka por ula ai khublei ïa ki bor pynïaid jong ka skul kiba la lah ban pynlong ïa kane ka taïew lehkmen, ha kaba la sam ruh ïa ki khusnam sha ki nongjop bapher bapher ïa ka Best Discipline Group la ïoh da ka Group Dahlia, katba ka Group Desert Rose kala long kum ka Best Group of the Year.
Kiwei de kiba la wan ban ïadon lang ki long u MLA ka thaiñ ma Kyrmen Shylla, Waheh Shnong ka Tuber ma Jiedlang San, u ma Richmond Dkhar, Secretary lem bad ki nonghikai skul.
