Pynkut ka M’laya da kaba khur 11 tylli ki takma ha ka 36th East Zone Junior Athletics Championship 2025

Shillong, Nailur 24: Ka kynhun ki nongïalehkai ka jylla Meghalaya ka la ïoh ban pynkut ïa ka jingïakhun ha ka lympung 36th East Zone Junior Athletics Championship 2025, kaba la long ha Ranchi, Jharkhand da kaba khur 11 tylli ki takma, kiba kynthup ïa san tylli ki rupa bad hynriew tylli ki rnong.
ïa kane la pynthikna hadien ba ka la ïoh ban khur biang sa saw tylli ki takma ha ka sngi ba lai bad kaba khatduh jong kane ka Championship.
Ka Damika R Lyngdoh kaba la khur ar tylli ki takma rupa shuwa ka sngi ba khatduh ka la ïoh ban khur ïa ka takma rnong ha ka jingïakop mareh kaba 200 mitar jong ki kynthei kiba hapoh 20 snem, da kaba pyndep ïa ka jingmareh hapoh 26.45 sekhon. Ka jingïoh khur jong ka haduh lai tylli ki takma ka pynlong ïa ka kum ka nongïalehkai kaba seisoh tam jong ka Meghalaya ha kane ka Championship.
Ka Balasiewdor Pathaw ka la wan ba lai ha ka jingïakop mareh kaba 3000m jong ki kynthei kiba hapoh 20 snem rta, hadien ba ka la lah ban pyndep ïa ka jingmareh hapoh 11 minit bad 24.62 sekhon.
Nangta u Semion Marak u la jop takma rnong ha ka High jump jong ki shynrang kiba hapoh 20 snem rta, da kaba kynthih ïa ka jingjrong kaba 1.80 mitar, katba ka Anrisha Klein ka la jop takma rnong ha ka high jump jong ki kynthei U-20 da kaba lah kynthih ïa ka jingjrong kaba 1.51 mitar.
Haba phaidien, ka jylla Meghalaya ka la khur san tylli ki takma hynnin ka sngi Ba-ar, kynthup ïa 3 tylli ki rupa bad 2 tylli ki rnong.
Haba phai sha ki jingïakop ba ka jylla ka la ïoh ban khur takma ha ka sngi Ba-ar na ka liang ki shynrang, u Renaldi Dhar u la khur takma rupa ha ka long jump jong ki shynrang kyrdan U-20, da ka jinglah jong u ban rynsied ha ka jingjngai kaba 6.88 mitar.
Katba na ka liang ki kynthei ka Tusame Marak ka la khur takma rnong ha ka jingïakop kawang sum (javelin) kiba hapoh 18 snem hadien ba ka la lah ban kawang ïa ka jingjngai kaba 35.04 mitar.
Nangta ka Damika R Lyngdoh ka la wan ba ar ha ka jingïakop mareh kaba 400 mitar jong ki kynthei kiba hapoh 20 snem da kaba shimpor 59.73 sekon, katba ka Rukini RT Dkhar ka la jop takma rnong ha ka jingïakop mareh kaba 600 mitar jong ki kynthei kiba hapoh 16 snem da kaba shimpor 1:40.79 sekon.
Nangta ka Enriyana G Momin ka la jop takma rupa ha ka long jump jong ki kynthei kiba hapoh 16 snem da kaba kynthih ïa ka jingjngai kaba 3.92mitar.
Ka jylla ka la sdang ïa ka lympung (Lah sngi U Blei) da kaba khur kawei ka takma rupa bad kawei ka rnong. ïa ka takma rnong la khur da ka Sibilda Maring kaba la wan kyrdan ba lai ha ka high jump jong ki kynthei kiba hapoh 18 snem rta, katba ïa ka takma rupa la khur da ka kynhun ki nongmareh; ba kynthup ïa ka Damika R Lyngdoh, Doniwell Langrin, Monlangki Kyndait bad Jebirth Ch Momin kiba la wan ba ar ha ka U-20 4x400m mixed relay.