Shillong, Ïaïong 22: Ka Meghalaya kala pynkut ïa ka jingïaid lynti jong ka da ka nam jop ha ka lympung ïalehkai Col CK Nayudu ha ka jingïakhun kaba saw bad kaba khadduh na ka plate group ha ka sngi Thohdieng ha Cuttack, da kaba pynliem da saw wicket pyrshah ïa ka Mizoram.
Da kaba jop arsien, ïakhaid shisien bad rem shisien, ka Meghalaya kala pynkut ha ka kyrdan kaba lai na katei ka group, ïaryngkat bad ka Nagaland kaba don ha ka kyrdan ba ar da kaba khur mar 13 point hynrei ïapher ha ka jingkamai ron bad khur wicket.
Ka Meghalaya ka la hap ban ïakhun ban jop da 83 ron ha ka inning kaba ar hynrei ka khlem lah ban kama ron ha kaba sdang ka jingïalehkai, da kaba duh noh saw wicket bad kamai tang 11 ron shwa ba u Abhishek Gupta bad u Roberth Sangma kin pynkhie khlieh biang ha ka kamai ron ban ïalam ïa ka kynhun sha ka kyrdan ba lai.
Ka Mizoram haba bteng biang ïa ka 170/8 bad kala lah ban kamai shuh sa 61 ron ban pyndep da 231 ron bad shah pynhap lut baroh ki wicket. Ki arngut ki rangïalehkai kila kamai ron lang da kaba ïarap ïa ka kynhun ban kamai sa 96 ron. U Abhishek Kumar marwei u ïoh ban pynhap ïa kitei ki ar tylli ki wicket bad pyndep ha kane ka sngi da kaba khur 3 wicket ai kamai 27 ron.
Ka Meghalaya ha ka inning kaba nyngkong ka kamai 375 bad ka Mizoram ka kamai 226 ron, ha kaba ka la buh ïa ka thong kaba 83 ron.
Ha kane ka jingïakhun, ka Mizoram kala lah ban ïalehkai bha ha ka liang ka kawang bol ha kaba kala ïoh ban pynhap ïa ki saw tylli ki wicket, hynrei u Gupta bad u Roberth kila kamai ron lang da 45 ron ha kaba ka kynhun kala jan kot sha ka thong shwa ba u Gupta (25) un shah pynhap wicket lyngba ka stumping.
Ka Meghalaya kala duh jingkyrmen hadien ba u Roberth u la shah pynhap wicket lyngba ka run out bad kamai 23 ron, kumta ka kynhun ka donkam sa 25 ron ban kynjoh sha ka thong da kaba sah sa saw wicket.
Ïa kitei ki ron la hap ban kitkhlieh da ki nongkawang bol ba kynthup ïa u Bipin Kumar Ray bad Agreas Chamcham Sangma ha kaba kitei ki arngut kila lah ban tied bha da kaba khyrwit lai tylli ki four bad kawei ka six ha kaba ka Meghalaya ka kamai da 85 ron duh noh 6 wicket.
