Pynkupburom u Lat ka jylla ïa ka Nongjri Presbyterian HSS – ka Lahduh ha ka U-15 Boys Subroto Cup

SHILLONG, Nailur 02: U Lat ka jylla Meghalaya – u CH Vijayashankar ha ka Lah Sngi U Blei (02 tarik Nailur 2024) u la pynlong ïa ka prokram ban pynkup burom ïa ka kynhun ïalehkai jong ka Nongjri Presbyterian Higher Secondary School kaba na Ribhoi District kaba dang shen ka la rah ïa ka U-15 Boys International Subroto Cup 2024 ha Durbar Hall-Raj Bhawan, Shillong.
Ha kane ka sngi la ïadon ryngkatlang ruh u Myntri Rangbah ka jylla- u Conrad K Sangma, u Myntri ka tnat Sports- Bah Shakliar Warjri, u MLA ka Mawhati – Bah Charles Marngar, MLA, ki dkhot na ka tnat Sports jong ka Sorkar jylla lem bad kiwei kiwei.
Haba ai jingkren kum u Kongsan, u CH Vijayashankar, u Lat ba donburom ka jylla Meghalaya, u la ong, “Namar Nga ruh Nga long u wei na ki nongïalehkai Sports Nga lah ban pynithuh ïalade bad kine ki samla. Ban rah namlahduh ha kane ka lympung kam dei kaei kaei kaba Ngin kheiñ sting. Nga ngeit ba ka por kaba biang eh ban hikai ïa kino kino ki khynnah ka dei ha ka rta ba 6 haduh 16 snem, bad da kaba kynmaw ïa kane, ka donkam ban pynshlur bad ai mynsiem khnang ba kin roi ha kane ka rta. ”
U Lat u la ïaroh ruh ïa ka jingtrei shitom jong ka Sorkar jylla kaba la kyrshan ïa kane ka kynhun ba kan lah ban poi sha ka thong ha kane ka lympung. Shuh shuh u la kyntu ïa ka sorkar ba kan bteng ruh ïa ka jingpyrshang ban kyntiew ïa ki kam ïalehkai namar ki samla ki long kiba kongsan tam ïa ka jylla.
Ha kawei pat ka liang, u Myntri Rangbah ka Jylla- u Conrad K Sangma u la ong, “Kane ka dei ka khyllipmat kaba ktah bad pynlung mynsiem bha. Ka dei ka jingleh sbun, kaba sngewrit bad da ka jingpyrkhat kaba u Lat ka jylla u la leh, bad ngam kynmaw ïa uno uno u Lat uba la ai khublei ïa kum kane ka prokram na ka bynta ka Sports bad Nga sngewnguh ïa u na bynta kane.”
Haba kren shaphang ki jingthmu ba ka sorkar ka la leh ban kyntiew ïa ka kam ïalehkai, u Myntri Rangbah u la ban jur ba na ka liang jong ka sorkar ka la bei tyngka shibun ban tei ïa ki jaka ïalehkai ha kine ki khyndiat snem ba la dep. U la kdew ruh ba kane ka sorkar kaba mynta ka la ïoh ban pynlong lai tylli na ki san tylli ki Meghalaya Games. U la pynpaw ruh ba ka sorkar ka la ïoh ban noh jingïarap ïa bun ki synjuk ïalehkai bapher bapher ban pynbha bad pynïaid ïa ki kam ïalehkai.
“Haba kylli shaphang ka jingmih ban nujor ïa ka jingkiew jong ka Sports kumjuh ruh ïa ka jingbei tyngka kaba heh ban tei ïa ki jingtei kiba ïadei bad ka kam ïalehkai, Nga ong ba ka jinglong bad ka jinglong ryntih kaba la pynrung ban pynroi sha ki samla lyngba ki Sports bapher bapher ka dei kaba sngewhun tam. Nga la sngewkmen ban ïohsngew ba ki khynnah shynrang ki la kut jingmut ban poi sha ka thong wat hapdeng ki jingeh bym biang ki jaka kilanmet. Ngan ïarap ban pynroi ïa ki jingtei ha ka jingtreikam lyngba ka Chief Minister’s Special Development Fund katba ngi dang pyrshang ban pynïoh ka jaka kaba thikna sha kane ka thaiñ.”
Ki kyrteng jong ki player kiba la shah pynkup burom ha kane ka sngi ki long: Yeomanly Son Shadap, lainehskhem Marboh, Prosperwell Ryntong, Richmond Lapang (Captain), Yeomanly Son Shadap, lainehskhem Marboh, Prosperwell Ryntong, Richmond Lapang (Captain), laisynroplang Syiemlieh, Franky Kharkrang, Dasuk Banphrang Diengdoh, Marc R Marak, Shanbok Basaiamoit, Nangsanbha Warjri, Banteilang Malieh, Pynshngain Khapew, Samuel Malieh, Namebanlam Nongkseh, Chanjib Chettry, Thrisilbirth A Sangma, Shri Jeffery Warlarpih, Pynkhreh Nongkseh.