Pynkup burom u Myntri Rangbah Duh ïa ka kynhun ka ri kaba ïashim bynta ha ka Commonwealth Games 2022

Shillong, Nailar 13 : U Myntri Rangbah Duh jong ka ri, u Narendra Modi u la pynkup burom ïa ki dkhot ka kynhun nongïalehkai jong ka ri kiba la leit ïashim bynta ha ka Commonwealth Games (CWG) 2022 ha New Delhi.
Ha kane ka prokram ban pynkup burom ïa ki la ïashim bynta ki nongïalehkai bad ki nongai jinghikai ïa ki. U Myntri Sorkar Pdeng ba dei khmih ïa ki tnat kam ïalehkai bad Information & Broadcasting, u Anurag Singh Thakur bad u Myntri Khynnah ka tnat ki kam ïalehkai, u Nisith Pramanik ki la ïadon lang. U Myntri Rangbah duh u la ai jingïaroh ïa ki nongïalehkai bad kito kiba ai jinghikai ïa ki namar ka jinglah wanrah jingjop jong ki ha ka Commonwealth Games 2022 kaba la pynlong ha Birmingham, ha kaba ka India ka la ïoh haduh 22 tylli ki takma ksiar, 16 ki takma rupa bad 23 tylli ki takma rnong ha ki jingïalehkai bapher bapher.
U Myntri Rangbah Duh u la pdiang burom ïa ki nongïalehkai bad ki nongai jinghikai ïa ki bad u la ong ba u dap da ka jingkmen namar ka jinglah leh bha ki nongïalehkai ka India ha ka CWG 2022. U la ong ba kadei kaei kaei kaba hap ban sngew sarong ba namar ka jingtrei shitom ki nongïalehkai, ka ri ka dang poi sha ka Azadi ka Amrit Kaal ryngkat ka jingjop kaba ai mynsiem.
U Myntri Rangbah Duh u la ong ba ha kine ki taïew ba la dep, ka ri ka la ïoh artylli ki jingjop kiba khraw ha ki kam ïalehkai. Ha ryngkat ka jingleh bha ha ka Commonwealth Games, ka ri ka la pynlong ïa ka Chess Olympiad ha ka sien kaba nyngkong.
Ha ka jingkren sha ki nongïalehkai, u Myntri Rangbah Duh u la ong, “Katba phi dang ïa don hapdeng ki jingïalehkai ha Birmingham, da ki klur ngut ki briew ka ri ki la peit miet hangne ha India ban peit ïa ki jingïalehkai jong phi. Ki bun ki briew kiba thiah bad ka buh alarm khnang ba kin ïoh jingtip shaphang ka rukom ïaid ka jingïalehkai jong phi.”
U Myntri Rangbah Duh u la ong ba katkum ka jingkular jong u haba kane ka kynhun ka la mih na ka ri, mynta ngi dang rakhe ïa ka jingjop. Ha ka jingkren shaphang ki jingjop, u Myntri Rangbah Duh u la ong ba ka jingïoh ïa ki khusnam kam pyni ïa ka jingshisha namar ki bun ki khusnam ba la lait tang khyndiat na kti bad ba ki nongïalehkai kin sa pynbeit ïa kane ha ki por ban wan. U la ong ba ka India ka la lap ïa ka lad ba thymmai ban ïoh jingjop ha saw jait ki jingïalehkai haba ïanujor bad ka lympung ïalehkai kaba la dep. Ki nongïalehkai ki la ïaleh bha ha ka lawn bowls bad ka athletics.
Lyngba kane ka jingjop, ka jingpdiang ki samla ka ri ïa ki jingïalehkai kiba thymmai kan sa dang kiew, la ong u Myntri Rangbah Duh. U Myntri u la kren ruh shaphang ki jingjop jong ki nongïalehkai kynthei ka ri ha ka boxing, judo, wrestling bad ka jingjop jong ki ha ka CWG 2022. U la ong ba 31 tylli ki khusnam ki la wan na ki nongïalehkai kiba la leit ïakhun nyngkong bad kane ka pyni ïa ka jingkiew ka jingsngewshngaiñ jong ki samla.