Shillong, Nailar 31 : Ka College of Teacher Education (PGT) Shillong ha ka 30tarik Nailar ka la pynlong ia ka jingpynkup burom ia ki samla pule jong ka kiba la pyndep bad leh bha ha ka B.Ed. 2025 bad ruh kiba lah ïoh ïa ka jingithuh kum ki nonghikai ba tbit ha kane kajuh ka eksamin.
Ha kane ka sngi pynkup burom la don ryngkat da u Bah Shakliar Warjri, Myntri ka tnad Sports jong ka sorkar jylla kum u Kongsan.
U Kongsan haba kren ha ka jingïalang u la kren halor ki jingeh ba ki briew ki ïakynduh ha ka jingim bad kumjuh ruh ïa ki jingeh ba ki nonghikai ki ïakynduh ha ka kam hikai, da kaba ban jur ïa ka jingdonkam jong ka jingïaishah bad ka jingaiti lut jong ki nonghikai ha la ki kam hikai. Ha kajuh ka por u la kitbok kitrwiang ïa ki samla pule ba kin ïoh ïa ka lawei kaba phyrnai bad kaba jop, da kaba ai mynsiem ïa ki ba kin ïaleh ban long kiba tbit ha baroh ki kam jong ki.
Na ka liang u Myntri u la kular ruh ban ai jingïarap ban pynkhlaiñ ïa ki lad jingïalehkai ha ka College, da kaba pyrkhat kyrpang ïa ka jingpynbha ïa ka jaka ïalehkai kilan met kaba la don lypa ha ka College of Teacher Education (PGT) Shillong. Kane ka jingkular ka pyni ïa ka jingpyrshang jong ka sorkar ban shim ïa ki sienjam ban kyntiew ïa ka jingroi jingpar kaba pura hapdeng ki samla pule bad ki nonghikai kumjuh lyngba ki jing lehkai sport bapher.
Ka Dr. B. Tron, Principal ka College ha ka jingkren, ka la ai khublei kyrpang ïa ki samla pule kiba lah pass bha ha ka B.Ed 2025 bad kumjuh ïa ki nonghikai halor ka jinglah jong ki ban long ka nuksa ïa ki khynnah ba pule ha ka College. Ka Principal ka la buh ruh ïa ka jingkyrpad ha u Myntri ban ai jingkyrshan na ka tnad ïalehkai ban pynbit pynbiang ïa ki jaka ïalehkai ha ka College.
Ïa kane ka jingïalang la pynphuh bad pynsngewtynnad da ki jingrwai, ki jingshad, bad ka prokram kolshor da ki samla pule ba mynta jong ka kolej, ryngkat bad ka jingpynkup burom ba kyrpang ïa ki san ngut ki nonghikai ba tbit bad hynriew ngut ki nonghikai kiba wan shakhmat ha ka B.Ed. 2025, kaba la pynlong ïa ki ban ïoh ïa ka jingithuh kyrpang namar ka jingtrei shitom, ka jingaiti, bad ka jingtbit jong kine ki samla ha ka jingpule jong ki.
