Pynkup burom u MLA Jirang ïa ki 140 ngut ki samla pule kynthup ïa u Sohan Thapa ba rung ha ka thup top-20 ka SSLC examination

Nongpoh, Naitung 20: Da ka jingangnud ban dang ai mynsiem ïa ki samla pule ka Constituency ban jam shaphrang ha ki jingpule ba kham shaneng bad kumjuh ruh ban pynpaw ïa ka jingkmen halor ka jingpas bha ha ka SSLC examination, u MLA ka Jirang Constituency hadien ba dang shen la dep ban pynkup burom ïa ki samla pule na ka thaiñ Jirang bad ha ka sngi Saitjaiñ pat u la pynkup burom sa ïa ki samla pule ha ka thaiñ Byrnihat kiba hap ha ka Jirang Constituency.
Ïa kane ka jingpynkup burom la pynlong ha Auditorium Hall, CTI, Umpher Byrnihat, ha kaba u MLA ka Jowai Constituency bad u ba dei ruh u Chairman ka MCCL, u Bah Wailadki Shylla u la wan ban shim bynta kum u kongsan ban pynkup burom ïa kitei ki samla pule ha ka jingdon ryngkat u MLA ka Jirang, u Bah Sosthenes Sohtun, u MDC ka Jirang, u Bah Victor Rani bad kynthup kiwei kiwei ki nongïalam ka NPP party bad ki Principal bad ki nonghikai na ki skul bapher bapher ba hap ha ka thaiñ Byrnihat.
Nalor kitei ki kynrem ki lyndan, ha kane ka sngi la sakhi lang ruh da ka jingdon lang ki kmie ki kpa bad kynthup ki 140 ngut ki samla ba la pass bha ha ka SSLC examination naduh u snem 2020 haduh u snem 2022, ba ym shym la ioh ban pynkup burom ha ki snem ba la dep na ka jingdon ka khlam COVID-19 bad mynta u snem pat la pynkup burom ïa ki samla pule kiba la pas bha ïa ka SSLC examination naduh u snem 2020 haduh u snem 2022.
Ha kane ka sngi, nalor ki 140 ngut ki samla ba la pas bha ha ka SSLC examination ba la pynkup burom bad na ka liang ka Felicitation Committee ka la pynkup burom kyrpang ruh ïa u Samla Sohan Thapa, uba dei u samla pule na ka New Era Secondary School, Mawsmai, kaba dei hadien ba u la rung sha ka thup ba 15 ha ka kyrdan top-20 ka SSLC examination 2022 bad na ka liang u MLA ka Jirang, u Bah Sosthenes Sohtun u la ai sngewbha kyrpang ruh da ka pisa bad ka Laptop kaba long shi bynta ka jingpynshlur ïa ki samla pule ba kin wan shakhmat ha ka SSLC examination kumba u la dep ban kular paidbah hapoh ka Constituency.
Haba kren ha kane ka jingïalang pynkup burom, naduh u MLA ka Jowai, u Bah Wailadki Shylla kum u kongsan bad u Bah Sosthenes Sohtun kum u MLA ba shim ïa kane ka bynta ban pynkup burom, ki la pynpaw ka jingkmen ba ki samla pule ka Jirang Constituency ruh ki la dang paw shakhmat ha ka pule ka puthi bad ki kyrmen skhem ruh da kaba pynlong ïa kum kane ka jingpynkup burom kan ai mynsiem ïa kine ki samla bad kumjuh ruh ïa kiwei ki samla pule ka Constituency bad ka District hi baroh kawei ba kin dang lah ban leh bha ha ki jingpule jongki.
Na ka liang kitei ki nongmihkhmat paidbah, ki la kyntu ruh ïa kine ki samla pule ba kin dang shim ïa ka jingkitkhlieh ban kiew sha ki kyradan kiba kham shaneng bad ka jingkhmih lynti jongki kum ki noingmihkhmat ka long ba ki samla kin don ïa kata ka mynsiem ban trei shitom ha ki jingpule bad lada ki la kiew ha ki kyrdan pule kan long ka jingmyntoi ym tang ïa lade shimet bad kan ai ruh ka jingmyntoi ïa ka ing ka sem bad ka imlang ka sahlang, ki la bynrap.