Nongpoh, Nailur 22: Kumba ju leh man u snem ban pynshlur ïaki samla pule ka thaiñ kiba wan shakhmat haka eksamin SSLC ba kin dang leh bha shuh shuh haki jingpule jong ki bad ban pynshlur ruh ïakiwei pat ki samla ba kin lehbha haki jingpule, ka NPP Block Committee jong ka Jirang Constituency ryngkat u MLA u Bah Sosthenes Sohtun haka sngi Saitjaiñ kila pynkup burom ïa 75 ngut ki samla pule na Jirang Constituency kiba la wan shakhmat ha ka eksamin SSLC jong u snem 2024.
Related Posts
Ïa katei ka jingïalang pynkup burom la pynlong ha CTI Auditorium Umpher ha kaba u Bah Sosthenes Sohtun MLA ka Jirang u la long kum u kongsan haka jingdon lang u Bah Victor Ranee MDC Jirang Constituency, u Abhilash Baranwal Deputy Commissioner Ri Bhoi, u pastor Kordor Swer Principal ka Mt. Zion Academy Secondary School, ka sister Molly Thomas Principal ka Savio Higher secondary school Bariduwa, ki nonghikai ki samla pule lem bad ki kmie ki kpa.
Ha katei ka sngi la ioh ruh ban ai da ka khusnam kaba kyrpang ïaka Ruphimon Makri ka khynnah pule kaba dang pule haka class 9 jong ka skul Mt Zion Academy ka la shah jied ban leit mihkhmat iaka Ri Bhoi District sha ka Prerana Program ha Vadnagar Ahmedabad Gujarat, u Krishna Koirala u ba la ioh 91.16% na Little Star Higher Secondary School 9 Mile Bariduwa, bad ïa u samla Jonny Nongrum u ba la jop na ka Muaythai Worlds Championship Indonesia 2023 bad MMA Fight Guwahati 2024.