Shillong, Ïaiong 16: U MLA ka South Shillong Constituency Bah Sanbor Shullai, hynne ka sngi saitjaiñ, ula pynkup burom ïa palat 151 ngut ki briew kiba ai sngewbha ïaki jaka khlem siew dor ban shna ïa ki surok PWD ha kylleng ki jaka jong ka thaiñ Greater Lumparing.
Haba kren ha ka jingïalang, u Bah Sanbor ula ongba ki briew ki dei ban shim ïa ka nuksa na kine ki151 ngut ki Nongshongshong ka Constituency kiba kloi ban ai ei ïa ki jaka ban pyntreikam ïa ki kam pynroi bapher bapher ha ka Constituency, ki ban ai jingmyntoi ïa ki paidbah.
“Nga dei ban ai khublei ïa ka Monitoring Committee jong ka South Shillong Constituency, baroh ki 151 ngut ki trai jaka, ka Dorbar Shnong ka Lower bad Upper Lumparing, Laban Riat Madan bad Mynsaiñ, ki Nongïalam Niam kiba la ai jingbit ban pyndonkam ïa ki jaka jong ki ha kaban shna ïa ki surok ïaid kali hapoh ka Constituency” ong u Ban Sanbor.
U Bah Sanbor ula ong ba ki trai jaka wat hapdeng ka jingbym ïoh ïa kano kano ka jingsiew ïa ka bai jaka na ka Sorkar Jylla, hynrei kila kloi ban ai ïa ka jaka jong ki ban shna ïa ki surok ïaid kali na ka bynta ka bit ka biang jong ki paid Nongshongshnong ka thaiñ baroh kawei.
Ula bynrap ba watla kam shym la don satia ka jingsiew hynrei ka Tnad PWD kala mynjur ban ai jingiarap katto katne ha kaban pynbna ïa ki kynroh lane ki ïing lada kine ki trai jaka ki donkam.
Ha kane ka sngi, u Bah Sanbor ula aiti ruh ïa ki work order ban shna ïa ki RCC jingtap slab halor ka wahduid na Smile Scholl ha Dhobi Ghat haduh ka Ïingsah jong u Bah John Wahlang bad kiwei ha Jumer Lane Laban kaba jngai kumba 1.2036 km, ha ka jinglut jingsep ba kot T. 1.13 klur nalor kiwei pat ki work order ban shna ïa ka surok na ka jingkieng ba marjan ka Ïing i Kong Nora Hynniewta sha Ekindro Diengdoh haduh ka surok PWD kabadon mar pyr shah ka Ophis MeECL ha Mawnei, kaba jngai kumba 0.281 km ha ka jinglut jingsep ba kot T. 4.72 klur.
