Shillong, Rymphang 12: Ka Ophis jong ka Social Welfare Department, Sorkar Meghalaya, ha ka jingïatreilang bad ka Lok Bhavan, ka la pynlong ïa ka prokram pynkup burom ïa ki briew kiba don jingduna ha ka met ha Durbar Hall, Lok Bhavan, Shillong, ha kaba u C.H. Vijayashankar, Lat ka Jylla u la wan kum u Kongsan.
Ha kane ka prokram la ïadon lang ruh u Bah Himalaya M. Shangpliang, Chief Adviser jong ka Meghalaya State Paralympics Association; H. C. Chaudhary, Principal Secretary sha u Lat ka jylla; Pravin Bakshi, Commissioner & Secretary sha u Lat ka jylla Meghalaya, Social Welfare Department; C.D. Lyngwa, Director, Social Welfare Department, Lyngkor Kynjing, Commissioner for Persons with Disabilities, Meghalaya nalor kiwei kiwei.
U Pravin Bakshi, IAS, Commissioner Secretary ka Sorkar Meghalaya, Social Welfare Department, u la kren halor ka jingangnud jong ka Sorkar ban pynkhlaiñ ïa ka jingïashim bynta, ka jingïaryngkat bad ka jingpynkupbor ïa ki briew kiba don jingduna ha ka met.
U Bah Himalaya M. Shangpliang, Chief Adviser, Meghalaya State Paralympics Association, u la kren shaphang ki jingïoh jingjop jong ki briew kiba don jingduna ha ka met, khamtam ha ka liang ka jingïalehkai sports bad kiwei pat ki bynta.
Ka bynta kaba kongsan tam jong ka prokram ka long ka jingpynkup burom ïa ki briew kiba don jingduna ha ka met kiba la wanrah nam ïa ka jylla ha ki rynsan ïakop bapher bapher, da kaba ithuh ïa ka jingjop bad ka jingtrei shitom jong ki kum ka nuksa ïa ka imlang ka sahlang.
Na ka liang jong u Lat u la ai jingïaroh ïa ka jingshlur, ka jingïai bteng bad ka jingjop, bad u la pynskhem ïa ka jingkut jingmut jong ka jylla ban wanrah ka jingïaryngkat, ka jingïoh bynta lang bad ka jingplie lad ïa baroh.
Ha kane ka prokram ki la don shiphew ngut ki briew kiba pawkhmat kiba don jingduna ha ki dkhot met kata; u Ferdinand Lyngdoh Marshillong, ka Anjelina Tynhiang, u Simseng M. Sangma, u Willingson Manar, u Orphon Nongrum, u Shanborlang Siangshai, u Madhu Subedhi, u Keneddy Rynjah, ka Jepora T. Sangma bad u Pillbert Hanse, kiba la shah pynkup burom ha u Lat ka jylla ha ka jingsakhi lang kiba haïing hasem.
