Nongpoh, Lber 28: U Myntri Rangbah ka jylla Assam u Himanta Biswa Sharma mynta ka sngi ula pynkup burom ïa ki 70 ngut ki Deputy Superintendent of Police (Probationers) naka jylla Assam bad Mizoram haka Passing Out Parade jong ka 54th Basic Course Trainees hadien ba kila pyndep ïaki jinghikai na North East Police Academy, Umsaw shuwa ba kin leit ban shimti pat ïaka kam sha ki jylla lajong.
Napdeng kitei ki 70 ngut ki pulit ophisar kiba la shah pynkup burom mynta ka sngi 62 ngut ki dei naka jylla Assam bad 8 ngut ki dei naka jylla Mizoram, ha kaba 20 ngut ki dei ki kynthei bad 50 ngut ki shynrang.
Ha katei ka sngi la sakhi ruh da ka jingdonlang u Danesh Rana, Director NEPA, ki heh pulit ophisar naka jylla Meghalaya bad Assam, ryngkat ki bahaiing hasem jong kitei ki pulit bala pyndep jinghikai bad kiwei kiwei.
Haba kren ha katei ka sngi naka liang u Himanta Biswa Sharma u la ong ba ki pulit ki don ka bynta kaba khraw ban pynneh ïaka shongsuk shongsaiñ bad kumjuh ruh ka jingshanñiah naki piadbah.
U la kyrpad ruh ïa kitei ki pulit ophisar ban pyndep hok ïaka kamram kumba la bynshet haki hadien bun ki jingeh ba kila mad haka por ba ki dang don hapdeng ka jingshah hikai, hynrei kane ka dei ka sngi kaba kmen ba kum ki pulit ophisar kin leit pat ban trei shala ki jong ki jylla bad kyntu ruh ïaki ban pynlong ïaki thanad ne ki Police Station kum ki jaka ba ki paidbah ki juh, khamtam ïakiba la kham rangbah, ki longkmie bad ki khynnah ban don ka jingïadei kaba jan hapdeng ki paidbah bad ki pulit.
