Pynkup burom u Bah M Kharkrang ïa 2 ngut shi para ba khur takma ha ka NEOG bad ha ka Karate ha New Delhi

Shillong, Nohprah 09 : U samla Lakhon Lanong u la ïoh ban khur takma Rupa ha ka jingïalehkai Karate kaba la tip kum ka Junior National Karate Championship ba la pynïaid da ka Karate Association of India (KIA) ha New Delhi, katba u samla Ram Lanong u la khur takma Rupa ha ka North East Olympic Games 2022 kaba dang shu kut shen hangne ha jylla Meghalaya.
Halor katei ka jingïoh khur takma, kitei ki arngut shi para kiba dang ha ka rta ba 15 snem ki la shah pynkup burom ha u Bah M Kharkrang (Retd IPS) uba dei mynta u State Executive Member bad Spokesperson jong ka BJP ha ka jingïadonlang u Bah Shri Daniel Diengdoh President BJYM Shillong City bad u Bah Dayo Sutnga President BJYM 17th North Shillong.
U Bah Kharkrang u la pynpaw ka jingsngewkmen ba kine ki arngut ki samla ki la ïoh ban khur takma na kitei ki rynsan ïalehkai bad kitbok kitrwiang ba kin nang ïai kiew shaphrang ha ka kam ïalehkai.
U la kyntu ruh ba kidei ban don ka mynsiem ïakhun bad ban trei shitom khnang ba kin nang lah ban wanrah nam bad burom ïa ka ïing ka sem, ka shnong ka thaw bad ïa ka jylla hi baroh kawei.