Mairang, Nohprah 19: U Additional District Magistrate (ADM) ka Mairang – u Bah Alertson Nongbri u la ïoh ban pynkup burom kyrpang ïa ki 7 ngut ki khynnah ïalehkai ka Khadsawphra MMA Dojo, Mairang kiba la khur ïa ka jingjop ha ka rynsan ïakhun kaba la tip da ka Octagon Fighting Championship 3.0 kaba la long ha Assam.
Kane ka kynhun ka la ïashim bynta kum ka jingiatreilang hapdeng ka Team Tribal Combat Academy, Shillong bad ka Khadsawphra MMA Dojo, Mairang ban mihkhmat ïa ka jylla ha katei ka rynsan ïakhun kaba la sdang naduh ka 12 tarik haduh ka 15 tarik u Nohprah, 2025.
Da ka jingtrei shitom bad kut jingmut jong ki nongïalehkai, kane ka kynhun ka la ïoh ban khur ïa ka khusnam (trophy) kum ka ‘Best Team’ ha ka lympung baroh kawei.
Ha kane ka Octagon Fighting Championship ki rang bad thei ïakura ka Khadsawphra MMA Dojo ki la pynkhih win ïa ka lympung da kaba khur haduh 6 tylli ki takma; ba kynthup ïa 4 tylli ki takma ksiar, kawei ka rupa bad kawei ka rnong. Nalor kine, ka kynhun ka la ïoh ruh ban jop kawei ka Title Belt lyngba u Malvin L. Marshillong, hadien ba u la jop ïa ka jingïakhun ha ka Senior Pro-Fight ha ka kyrdan jingkhia kaba 56kg.
Kiba la jop takma ksiar ki long u Alikstar Mawlong, u Bankitlang Nongrum, Joviality L. Kynshi bad ka Phidari Rani. Kiba la khur takme rupa bad rnong ki long: Ialamjingshai L. Mawlong bad Pynjanai Wahlang.
Na ka liang jong u Coach jong ka kynhun u la pynpaw ïa ka jingsngewnguh kaba khraw sha ki kmie ki kpa kiba la long ki nongai mynsiem bad ki nongkyrshan ba radbah ïa kine ki khynnah.
Shuh shuh, ka kynhun ka ai khublei kyrpang ïa u SP ka Mairang bad ïa u MLA ka Constituency Mairang kiba la ai ka jingkyrshan kaba pura ïa ka Team Khadsawphra MMA Dojo. Ka jingkyrshan jong ki ka la long ka lad ïa kine ki rang bad thei ïakura ban pyni ïa ka sap bad ban wanrah nam ïa ka dong ka thaiñ Mairang.
U ADM ha ka jingkren pynkup burom u la kyntu ïa ki samla ban nang ïai minot bad ban kiar na ki jingsniew khnang ba ka Mairang kan nang pynmih shuh shuh ki khlur kiba phyrnai ha ka kam ïalehkai Combat sports.
