Pynkup burom kyrpang ka Eastern Command ïa ki shipai ba aiti bad lenlade na ka bynta ka ri
Shillong, Rymphang 10: Kum shi bynta ban pynshlur bad ai mynsiem ïa ki nongïada ïa ka ri, ki shipai kiba don sha kane ka thaiñ shatei lammihngi ki la pynlong ïa ka jingsam khusnam bad pynkup burom kaba kyrpang da ki kyrdan bapher bapher sha ki shipai ophisar da ka prokram kaba la khot ka Eastern Command Investiture Ceremony kaba la long ha ka sngi baar ha jaka ba ju ai jinghikai ïa ki shipai ka Eastern Command kaba don ha Umroi Military Station, Ri Bhoi District, Meghalaya.
Kane ka prokram ka long ban ai burom ïa ki shipai kiba shlur, ki shipai kiba don ki sap kyrpang bad ki unit kiba lehbha jong ka Eastern Command.
U Lieutenant General Ram Chander Tiwari, General Officer Commanding-in-Chief, Eastern Command u la long u kongsan bad uba la sam bad aiti ruh ïa ki khusnam sha ki shipai kiba la lehbha ha ki kam shakri ha ki kyrdan bad ki jingaiti ban ïada ïa ka ri na ki kti ki nongshun.
Ha kane ka sngi la don palat 38 ngut ki shipai ba kynthup ïa 19 ngut kiba ïoh ïa ki Sena Medal (Gallantry), 8 ngut kiba ïoh Sena Medal (Distinguished), 2 ngut ha ka Yudh seva Medal, 1 Bar to Vishisht Seva Medal, 7 ngut ha ka Vishisht Seva Medal bad 1 ha ka Uttam Jeevan Raksha Padak.
Shuh shuh kumba 49 tylli ki Unit ki la shah pynkup burom kum ka dak ka jingïaroh kaba ki la leh ïa ki kam shakri jong ki hapoh ka GOC-in-C Eastern Command unit.
U kongsan uba dei ruh u heh duh ki shipai ka Eastern Command u Leutenant Tiwari u la pynpaw ka jingsngewbha shibun eh haba u ïohi ba ki shipai kiba don ha ki kyrdan bapher bapher ki la ai ïa ka jingshakri kaba bha tam da kaba ïada bad aiti ïa ka kam shakri na ka bynta ka ri, bad kumjuh ruh ïa kito ki shipai kiba la kylla long martyr na ka bynta ka ri.
Ha kane ka prokram bad ka jingleh burom ïa ki shipai la sakhi lang da ki bahaïing hasem jong kiba ïoh khusnam, ki shipai ophisar ba la heh kyrdan jong ka Indian Defence Force, nangta ki shipai ba la shongthait bad kiwei ki heh ki haiñ kiba la shah khot sngewbha.
Katba ha ka sngi nyngkong ka 9 tarik mynta u bnai ka la don ka cultural Concert “Shaurya Sandhya” kaba kynthup ïa ka shad Chenda Mellam, Chau Dance, North East Warrior Dance, Tribal dance, Army Brass Band, Symphony Band bad ka jingpyni ïa ki sap ki phong na ki kynhun bapher bapher kum ka Prince Group bad Dancing Feet group kaba long ruh kum ka Sngi sdang ïa kane ka prokram pynkup burom.