Nongpoh, Jylliew 17: Ka tnad pulit jong ka Ri-Bhoi mynta ka sngi da ka jingsngew sarong ka la pynkup burom ïa u Alan Sun Marbañiang u ba dei uwei na ki rangïakhun kti ba paw ha ka jylla ba dei ruh kum u UBC ha ka tnad pulit ha Ri-Bhoi, hadien ba u la wanrah nam bad burom ïa ka jylla bad kumjuh ruh ka tnad pulit baroh kawei halor ka jinglah jong u ban khur 2 tylli ki takma rupa ha ka 44th National Arm Wrestling 2022 kaba dang shu long shen ha Hyderabad.
Ha katei ka jingpynkup burom la don ryngkat ruh da u Giri Prasad Superintendent of Police Ri-Bhoi District, K Prasad Additional SP, Bah S Pasleiñ DSP Headquarter, Bah G Marshillong DSP Traffic bad kiwei kiwei ki ophisar ka tnad pulit ha Ri-Bhoi.
Kum ban shu pynpaw ba u Bah Allan Sun Marbaniang u dei ruh u pulit UBC ha Police Reserve Nongpoh, bad u la leit ruh ban mihkhmat ïa ka jylla sha ka 44th National Arm Wrestling Championship 2022 kaba dang shu long shen ha Hyderabad ha kaba u la jop ruh ïa ki takma rupa ha ka jingïakhun 85kg Senior Men Category ha ka kti kadiang bad kamon (left and right arm).
Na ka liang ki heh pulit jong ka Ri-Bhoi kila pynpaw ka jingsngewkmen kaba khraw kaba long ka jingsarong ïa ka tnad pulit bad ka jylla baroh kawei bad ai ruh ka jingkitbok kitrwiang ba un dang lah shuh shuh ban wanrah ka nam bad burom ha kiwei pat ki jingïakhun ba kham heh.
Haba kren bad u Bah Allan Sun Marbañiang u la pynpaw ka jingsngewkmen kaba khraw ba u la ïoh ban leit shim bynta ha katei ka lympung bad ïoh ruh ban khur takma kaba long ka jingkmen kaba khraw ïa u bad ka jylla baroh kawei halor ka nam bad ka burom, bad mynta un leit ruh ban shim bynta ha kawei ka tournament ka ban sa long ha Gwalior kum ka jingpynkhreh ban leit shim bynta pat ha ka World Arm Wrestling Championship ban ïaknieh ïa ka nam lahduh ha ka pyrthei ka ban sa long ha ka ri Turkey ha u bnai Risaw.
