Pynkup burom ka Thadmuthlong C Phramer ïa u Budki Suchiang, MPS ba nyngkong ka Shnong

Jowai, Risaw 28 : Ka Dorbar Shnong Thadmuthlong C Phramer, Elaka Shangpung, West Jaiñtia Hills ha kane ka 26 tarik u Risaw kala pynkup burom ïa u Budki Suchiang uba la pass ïa ka MPSC 2024 haka Unreseved Seat ban trei haka kyrdan MPS kum u DSP bad ka dei ruh ka sien ba nyngkong ïa u khun ka shnong ban long MPS.
U Budki Suchiang u dei na kane ka shnong Thadmuthlong C Phramer, u dei u khun jong ka kong Rilda Suchiang bad u ma Rolly Lyngdoh.
Ha kane ka sngi pynkup burom la wan ban donlang da ki ar tylli ki Dong hapoh kane ka shnong kata ka Dong Phramer, Dong Muchut, kumjuh ki dkhot VDP Shnong, Phramer Youth Culture & Sport Club, ka seng ki longkmie bad ka Phramer Unit Seiñ Raij Club.
Kum ki nongïalam Shnong naduh u Waheh Shnong u ma Balen Tang, u Secretary Chnong u ma Yooki Suchiang bad ki Rangbah Dong ki Secretary Dong kila wan ïadonlang, ha ka juh ka por la ai mynsiem bad kitbok kitrwiang ïa u Budki Suchiang ba un dang kiew shaphrang ha ki liang baroh.