Nongpoh, Nohprah 10: Ban ai burom ïa ki samla ka Ri Bhoi kiba la wan rah ïa ka nam bad ka burom da kaba ki la ioh ban khur ïa ka nam jop ha ka North East Olymping Game kaba dang shu dep shen ha Nongbah Shillong, ka Synjuk ki Rangbah Shnong Ri Bhoi District mynta ka sngi ki la pynkup burom ïa kitei ki samla da kaba ai burom da ki jingai sngewbha ryngkat ka song pisa kum shi bynta ban ai burom halor ki nam jop ba ki la wan rah burom ïa ka Ri Bhoi District bad ïa ka jylla hi baroh kawei.
Ha kane ka sngi, ka Synjuk ki Rangbah Shnong Ri Bhoi District ki la pynkup burom ruh ïa ka Kong Margret Pathaw, kawei na ka Longkmie kaba la ioh khur ïa ka takma ksiar na ka World Arm Wrestling Championship kaba dang shu dep shen ha ri Turkey bad ki la ai burom ruh da ki jaiñ ryndia bad kiwei kiwei jingai sngewbha ryngkat ka song pisa.
Ïa kane ka jingpynkup burom la pynlong ha Ing Dorbar Nongpoh, ha kaba la wan ban shim bynta da u DSP ka Ri Bhoi, u Bah G. Marshillong kum u kongsan bad la don ryngkat ruh naduh u Bah B.B Makdoh, President ka Synjuk, u bah P.B Sylliang, Secretary, u Rocky Kylla, u Bah Marcus Marten, president ka HNYF Northern Region nalor kiwei kiwei ki nongïalam bad kynthup ruh kitei ki samla kiba la ioh khur ïa ki takma bapher bapher ha North East Olympic game kaba dang shu dep long shen ha Shillong.
Kitei ki samla kiba la shah pynkup burom ki kynthup ïa u Samla Skhemlang Suba uab al ioh rah ïa ka takma ksiar ha 800 bad 1500 Mts, u samla Albinus Rongpeit ba la ioh khur takma ksiar ha ka High Jump, Primus Ronghi ba la ioh khur takma ksiar ha ka Long Jump bad takma rnog ha ka High Jump, ka samla Rinalis Ingti takma ksiar ha ka High jump, ka samla Ritina Hanse kaba la ioh khur takma ksiar ha ka 400 ,4×400 Mixed Relay bad takma rnong ha ka 4×100 relay race, ka samla Melibad Kro takma ksiar ha ka Javelin throw, Joytiful Narlong ba la ioh khur takma rupa ha ka Long Jump, ka samla Anrisha Klein ka takma rupa ha ka High jump, Anastasius Ryndongsngi ba la ioh khur takma rnong ha ka weigh Lifting, u samla Donald Rymbai ha ka weight lifting ba la ioh khur takma rnong ha ka jingkhia ba 109 kg bad ka samla Ibakhamtilut Namsaw kaba la ioh khur takma rnong ha ka jingkhia ba 71kg.
Na ka liang u DSP ka Ri Bhoi, u Bah G. Marshillong haba kren ha kane ka snig u la ai khublei ïa ka Synjuk kaba la shim ïa kane ka bynta ban pynkup burom ïa kine ki samla kiba la rah ïa ka nam bad ka burom ka District bad ka jylla bad kum kane ka jingpynkup burom ka long ka jingai mynsiem ïa kiwei pat ki khun samla ba kin dang shlur ban im sngi ha ki kam ïalehkai sport.
Shuh shuh, u ong ruh ka sorkar ka la phai khmat mynta sha ki samla don sap ha ka kam ïalehkai sport bad ka dei pat ka kamram jong ki samla ban pyndonkam hok ïa ki sap ki phong ba ki don, namar dei tang kito ki samla kiba pyndonkam hok ïa ka sap ki lah ban poi sha ka thong kaba ki angnud khamta ka jingïalehkai sport ha kine ki sngi ka la dei kawei na ka lad ai kam ai jam ïa ki khun samla ka jylla, u la bynrap.
