Mawkyrwat, ‘Naitung 27: Ka Seng Samla Shnong Mawten mynta ka sngi ba ar jong ka taïew da ka mynsiem jong ka jingsngewkmen bad jingsngewsarong ka la ïoh ban pdiang sngewbha bad pynkupburom ïa ki ar ngut ki khun samla jong ka shnong kiba la wan phai ryngkat ka jingwanrah burom lyngba ka jingjop jong ki ha ka ‘WAKO India Children, Cadets & Juniors National Kickboxing Championship’ kaba la long ha Kolkata, West Bengal.
Lah ban kdew ba ka jingïoh khusnam jong kine ki ar ngut ki samla na ka shnong Mawten ka dei ha ka lympung ïalehkai jong ka ‘WAKO India Children, Cadets & Juniors National Kickboxing Championship’ kaba la long ha ka 19 haduh 23 tarik u ‘Naitung, 2022 ha Kolkata, West Bengal ba la pynïaid da ka West Bengal Sports Kickboxing Association.
Ka Indahun Iawphniaw ka la ïoh ïa ka tama rnong (Bronze) ha ka bynta jong ki Older Junior 17 haduh 18 snem, katba u Lumjingsuk Iawphniaw pat ha ka tama ksiar (Golden) jong ki Junior 15.
Shuh shuh katkum ka jingïathuh jong ki ba kane ka lympung ïalehkai ka long ruh kum shibynta ba jied ïa ki khynnah samla ki ba sa mihkhmat ha ka WAKO Children, Cadets & Juniors World Champion (All Discipline) ha ka Italy ka ban sa long ha ka 30 tarik u ‘Nailur – 09 tarik u Risaw, 2022.
Ha kaba bad ka jingpule pat ka Indahun Iawphniaw ka pule hapoh ka Lady Kane College, Shillong ha ka BA 1st Semester katba u Lumjingsuk Iawphniaw hapoh ka Jaiaw Presbyterian Higher Secondary ha ka klas XI.
Na ka liang u Secretary jong ka Seng Samla Shnong Mawten, bah Joystarlin Marngar ha ka jingkren jong u ha ka jingïalang ba lyngkot ha shnong Mawten, u la pynpaw ka jingaikhublei na ka bynta ki ar ngut ki khun samla jong ka shnong kiba la wanrah burom ïa ka ïing ka sem, k shnong ka thaw, ka distrik bad ka jylla baroh kawei lyngba ka jingïoh jong ki ïa ki khusnam na ka jingleit ïa shimbynta jong ki ha ‘WAKO India Children, Cadets & Juniors National Kickboxing Championship’ ha Kolkata, West Bengal.
Namarkata, u la ai mynsiem ryngkat ki kyntien jingkitbol kitrwiang ba kin nangtrei shitom bad ïai minot ha la ka kam khnang ba kin nangkiew shaphrang ha ka kam ïalehkai.
Na ka liang ka Indahun Iawphniaw, u Lumjingsuk Iawphniaw ha ryngkat u kpa u bah Phrimland Lyngkhoi bad ka kmie ka kong Takda Iawphniaw ki la pynpaw ka jingnguh bad ai ka jingïaroh ïa U Blei Uba la ri bad sumar ïa ki ha ka jingiaid lynti jong ki kaba manla ka sngi namar khlem ma U kin nym lah ban long kumne kumba ki long. Shuh shuh ki la aikhublei kaba kyrpang ruh na ka bynta ka Seng Samla Shnong Mawten bad ïa shnong baroh kawei kiba la pdiang sngewbha ryngkat ka jingpynkup burom haba ki wan phai sha shnong.
“Ngi pynpaw ruh ka jingaikhublei na ka bynta ki nonghikai kiba long ki coach, ki nonghikai ha ki jaka pule bad ïa baroh kiba ju ai mynsiem ïa ngi ban leit ïashimbynta ha kane ka jingïakop”, ong ka Indahun Iawphniaw bad u Lumjingsuk Iawphniaw bad ka jingaimynsiem jong ki kmie ki kpa ruh ka dei kawei ka bynta ba kongsan tam ha ka jingim jong ngi ba ngin kiew ha ki kam ki jong ngi.
Ki la ong ruh ba watla hapdeng ki jingeh kiba bun ba ki ïa kynduh bad ka jingïoh ban kilanmet ba tang khyndiat por hynrei da ka jingtrei shitom ryngkat ka jingïaishah ki la ïoh kheit ïa u soh jong ka jingjop. Namarkata, ki la buh ka jingkyrpad bad ai mynsiem na ka bynta ki para samla jong ka dong ka thaiñ, ka distrik, ka jylla bad ka ri hi baroh kawei na haba ki don ka jingthmu ban leh ïa kano kano ka kam ki dei ban long kiba aiti lut, trei shitom ryngkat ka jinglong ryntih ha kiei kiei baroh.
