Shillong, Ïaïong 17: Ka Seng Samla Shnong Mawphlang ha ka 16 tarik Ïaïong 2022, kala pynkup burom ïa u samla Banshemphang Pathaw u ba shong basah ha shnong Mawphlang, hadien ba u la ïoh ban khur ïa ka takma Rupa na ka kyrdan ïakhun ba 45 kg jong ki shynrang ha ka jingïalehkai Kickboxing kaba la long ha jylla Goa ha ka 1 bad 2 tarik Ïaïong 2022.
Ha kane ka jingïalang la ïoh ruh ka jingkren na u rangbah shnong bad ki riew rangbah jong ka shnong Mawphlang kiba la ai ïa ka kyntien kitbok kitrwiang bad kumjuh ki ktien sneng ktien kraw ïa u Samla Banshemphang Pathaw.
La ïoh ruh ka jingkren na u President ka Mawphlang Sports Club Bah Alanstar Kharbani bad na u Samla Tyngshailang Wankhar uba long ruh u General Secretary ka Seng Samla Shnong Mawphlang, Bah Bashankupar Khonghat bad kiwei kiwei kiwei. Na ka liang ka Seng Samla Shnong Mawphlang ka dap da ka jingsngew sarong ba u samla Banshemphang Pathaw u la wanrah ïa ka nam bad ka burom ym tang ïa ka ïing ka sem hynrei wat ïa ka shnong ka thaw bad kumjuh ruh ïa ka jylla hi baroh kawei.
Kila kyntu ba un nang pyndonkam hok ïa ka sap ba U Blei u la ai bad ban kiar na kiba bun ki jingpynshoi khamtam na ki jingmlien ba sniew kiba pynjot ïa ka jingim, hynrei ban pynleit jingmut beit ha kane ka kam kaba ymdei tang ka jingïalehkai pynbyrniga hynrei kadei ruh ka lad kamai jakpoh.
U samla Banshemphang Pathaw u la ai khublei ïa ka Seng Samla Shnong Mawphlang kaba la pynkup burom kyrpang na bynta jong u kaban long ka jingai mynsiem shuh shuh na bynta jong u ban nang leh bha nangne shakhmat bad kumjuh ruh ïa ki riew rangbah kiba la ai ki kyntien sneng kyntien kraw na bynta jong u.
