Shillong, Nailur, 03: Kum shi bynta ban nang ai mynsiem shuh shuh ïa ki samla kiba la pas bha ha ki jingpule bapher bapher ki jong ki, ha ka sngi Saitjaiñ ka Seng Samla Mawlai Nongpdeng ka la pynkup burom ïa ki 10 ngut ki samla pule kiba shong basah hapoh u pud u sam jong ka Mawlai Nongpdeng kiba la pas bha ha ka eksamin Secondary School Leaving Certificate bad ka Higher Secondary School Leaving Certificate ba la pynbna dang ha kine ki khyndiat bnai baladep da ka Meghalaya Board of School Education.
Ha kane ka sngi, ka seng samla ka la pynkup burom ruh ïa u Bah Hearing Shangpliang uba long u coach uba la pawbha ha ka jylla ban ai jinghikai ha ka liang ka phutbol ïa ki samla ha ki Club bapher bapher bad u dei ruh u Coach uba nyngkong eh ban pynrung ïa ka Shillong Lajong Football Club sha ka lympung ïalehkai I-League.
Ka Seng samla ka la pynkup burom ruh ïa uwei u heprit uba don jingduna ha ki dkhotmet u samla Kenny Shemphang Kharjana uba la pynpaw ïa la ka jong ka jingshlur ban ïarap ïa kawei ka longkmie kaba la shah lute ha ki runar dang shen.
Ha kane ka jingpynkup burom la sakhi lang da u MDC jong ka Mawlai Constituency u Bah Teiborlang Pathaw uba la long kum u kongsan ryngkat ka jingïadonlang jong u Rangbah Shnong u Bah P. Khongsit, u President jong ka Seng Samla Mawlai Pyllun u Bah Samuel Biam, u secretary u samla Simran Syiem, ki nongkitkam jong ka seng Samla Mawlai Mongpdeng ,ki kmie ki kpa bad kiwei kiwei kiba la shah khot sngewbha.
Ha kane kajuh ka sngi u Bah Teiborlang Pathaw u la plile paidbah ïa ka Basketball Court bad bad ka Painkhana paidbah kiba don hapoh ka shnong Mawlai Nongpdeng.
