Nongpoh, Naitung 02: Shi bynta ban ai mynsiem ïaki samla pule ba kin dang kiew shaphrang haki jingpule jong ki ba kham shalor kaba long ruh ka nuksa ïa kiwei pat ki samla pule ba kin minot thop haki jingpule, ka Seng Samla Pahamlapong bad Pahamsohthri mynta ka sngi kala mynkup burom ïa 15 ngut ki samla pule jong ka shnong kiba la pass bha haka eksamin SSLC bad HSSLC.
Ha katei ka jingpynkup burom naka liang ka seng samla kala aiti ruh da ki memento sha ki samla pule kum ka dak ka jingsah kynmaw bad ai mynsiem ïaki ha kaba u Bah Mayral Born Syiem MLA ka Nongpoh u la wan ban shim bynta kum u kongsan haka jingdonlang u Dr. Esra Syiem bad u Aristone Manbha Ryndongsngi kum ki symbud kongsan ki nongïalam ka seng samla, bad ki nongïalam shnong ryngkat ki longkmie longkpa jong ka shnong.
Haba kren ha katei ka sngi naka liang u Bah Mayral Born Syiem u la ai ka jingïaroh ïaka seng Samla Pahamlapong bad Pahamsohthri kaba la shim ïaka sienjam ban pynlong kum katei ka jait prokram ban pynkup burom ïaki samla pule da ka jingangnud ban pynshlur bad ban ai mynsiem ïaki khun samla jong ka shnong ba kin dang kiew shaphrang bad ba kin dang bteng ban leh bha haki jingpule ba kham shalor.
U la ong ruh ba ka jingnang jingstad ka long kaba kongsan ha kane ka juk kaba mynta ba kum ki khun samla kim dei ban pynsepei kai ïaka por haki kam ba khlem don kano kano ka jingmyntoi hynrei ban long ki khynnah kiba minot thop haki jingpule bad kumjuh ruh haka sap kaba ki don, namar khlem ka jingnang jingstad ka long kaba khlem nongrim ïaki samla ha kane ka juk kaba mynta.
Naka liang u Bah Mayral Born Syiem u la kyntu ruh ïaki khun samla ba kin dang trei shitom haki jingpule jong ki ba kham shalor la ki leit ban bteng ha kano kano ka jaka ryngkat ka akor ka burom ban long ki samla kiba tipsngi bad tip briew tip blei ban kiar naki kam sniew bad ki jingpynshoi ba har rukom khnang ba kin long ki khlur ba tyngshaiñ haka jingim jong ki bad poi sha ka thong kumba ki angnud.
