Shillong, Naitung : Ka Seng Samla Dong Sohplom jong ka shnong Mawlai Umthlong ka la pynkup burom ïa ki samla ba pass bha ha ka eksamin SSLC bad HSSLC jong ka shnong ba la pynlong hapoh shnong ha ka sngi Nyngkong ba la lah.
Ha katei ka jingpynkup burom la ïa don lang u MLA ka thaiñ u Bah PT Sawkmie, u rangbah shnong bah Tyllilang Mylliem Umlong, ki nongkitkam dong bad kiwei kiwei.
Haba ai jingkren shuwa ban pynkup burom u Bah PT Sawkmie u la pynpaw ka jingsngewkmen ban don bynta lang bad ka seng samla ba sam khusnam sha kiba pass bha.
Na ka liang u MLA u la ong ba ha ba ïoh ban pynkup burom katno ka long kaba sngewkmen, namar kane ka ai mynsiem ïa phi ki samla ban nang trei shitom bad pule kham bha khnang ban ïoh ïa ka lawei ka ba phyrnai.Ha ka juh ka por u la kyntu ïa ki samla ki ba don lang ha kane ka sngi, hadien ba la pyndep ïa ka klas 12 ki hap pyrkhat bha ïa ka lawei jong ki, ka laiñ aïu ba kin leit pule bad kum kiei ki kyrdan ka ba ki hap ban pass.
Nalor kata u la ïathuh ba ha kine ki sngi kiba mynta wat ha ka kam mechanic haba shna kali, ki nongshna ki sei da ki laptop, ban check ban khmih naei sniew ka kali, kane ka pyni ïa ka jingdonkam ïa ka jingnang jingstad ha kine ki sngi la phi trei ha kino kino ki jaitkam ruh.
Shuh shuh ha kane ka sngi la ïoh ruh ka jingkren na u Rangbah shnong bah Tyllilang Mylliem Umlong uba la pynpaw ka jingsngewkmen ha ka ba ïa dei bad kane ka sienjam ba ka seng samla dong Sohplom ka shim ban ai mynsiem bad pynshlur shuh shuh ïa ki khun samla.
