Nongpoh, Risaw 22: Ka jingshah jied Myntri sorkar u Bah Sosthenes Sohtun ka long ka jingkmen ïaka district baroh kawei ha kaba ki jingsngewnguh bad ka jingpyndonburom kam pat kut, namar u dei u briew u ba kham pher u ba baroh ki paidbah ki ieid bad sngewjan.
Naka liang ki nongïalam shnong ka them Ri-Bhoi hapoh ka lama ka Synjuk ki Rangbah Shnong, Ri-Bhoi District hapoh ka jingïalam u Bah BB Makdoh kum u Chairman lem bad u Bah PB Sylliang kum u General Secretary mynta ka sngi kila pynkup burom ïa u Bah Sosthenes Sohtun kum u myntri sorkar jylla ba dei peit ruh ïaka tnad C&RD, GAD bad SAD haka jingïalang kaba la long ha Conference Hall ka DRDA ha Nongpoh.
Ha katei ka jingïalang pynkup burom naka liang ka Synjuk ki Rangbah Shnong kila pynkup burom ruh da ka jaiñ Ryndia, syntiew bad momentous kum ka dak ka jingsah jingkynmaw ba u Bah Sosthenes Sohtun u la ioh bsuh haka kynhun myntri ka sokar jylla naka bynta ban dang bteng ka jingshakri paidbah khamtam ban wanrah ki kam pynroi.
Ha kane ka sngi nalor ki Rangbah Shnong la sakhi ruh da ka jingdonlang u Bah Mayral Born Syiem MLA ka Nongpoh, u Bah Ferdinald Kharkamni President ka KSU North Khasi Hills District, Bah Bawantippor Marweiñ Finance Secretary ka RBYF bad kiwei kiwei.
Haba kren ha kane ka sngi naka liang ki nongïalam ka Synjuk ki Rangbah Shnong kila pynpaw ba u MLA ka Jirang u Bah Sosthenes Sohtun u ba la shah jied mynta ban long kum u myntri sorkar u dei shisha u myntri u ba kham pher ba ki briew baroh ki ieid bad sngewtynnad bad kane ka jinglong kyrpang bad ka jingsngewrit jong ka pynkhraw ïa u haduh ba un da ioh long kum u myntri sorkar kaba long ka jingsarong kaba khraw ïaka them Ri-Bhoi baroh kawei ba ka jingioh myntri ka long shisha ka jingkyrkhu ban dang wanrah ki kam pynroi.
Naka liang u Bah Sosthenes Sohtun kum u Myntri sorkar haba kren ha kane ka sngi u la pynpaw ka jingsngewkmen bad ka jingsngewnguh kaba khraw ïaki nongïalam shnong kiba la kynmaw ban leh burom bad kane ka dei ka jingsarong ïaka district baroh kawei bad kum u myntri u la kular ruh ban dang trei kham bha shuh shuh ïaka Constituency, ka dong Ri-Bhoi lem bad ka jylla baroh kawei.
