Pynkup burom ka Social Welfare ïa ar ngut ki ‘riew tymmen ba la palat 90 snem

Mawkyrwat, ‘Naiwieng 13 : Kum shibynta jong ka jingkynmaw burom ïa ka sngi kyrpang jong ki ‘riew tymmen ne ka International Day for Older Persons, ka ophis jong u District Social Welfare Officer (DSWO), South West Khasi Hills District ryngkat ka District SANKALP HUB for Empowerment of Women, South West Khasi Hills District ka la pynlong ïa ka program halor ka phang, “Ka jinglong tymmen ryngkat bad ka burom: Ka Jingdonkam ban pynkhlaiñ ïa ki rukom sumar bad kyrshan ïa ki tymmen ha kylleng ka pyrthei” ba la pynlong hapoh ka Community Hall jong ka Shnong Rangthong, South West Khasi Hills District.
U bah Renikton Lyngdoh Tongkhar, MLA ka Mawkyrwat Constituency bad u Nongaibuit jong ka Sorkar Meghalaya, ka tnad Social Welfare, haba kren kum u kongsan u la pynpaw ba ïa kane ka sngi la pynkup burom bad pyndonburom ïa ki tymmen ki san jong ka District, da kaba ithuh ïa ki kum ki dkhot ba kordor bad ba ieid ïa ka jingsuk ha ka imlang sahlang.
Namarkata, u la ban jur ïa ka jingdonkam ban pynneh ïa ka koit ka khiah jong ki, khamtam haba ki briew kin nangsan, bad ula pynshlur ïa ki tymmen ban buh hakhmat eh ïa ka jingkoit jingkhiah jong ki da kaba shim kabu ïa ki lad jingshakri na ka koit ka khiah kiba la tyrwa ha ki jaka sumar ha ka distrik. Ym tang kata, u la ai jingmut ruh ïa ki ‘riew shimet kiba la kham rangbah ban pdiang pura ïa ka jingim, ban ïashimbynta ha ki kam kiba sngewtynnad bad ki paralok bad ban ïashimbynta ha ki jingïalang bad ki jingïalehkai met kiba jem. U la pynkut da kaba u la ïa ki jingkyrkhu kyrdoh na ka bynta ka jingim kaba kmen, kaba koit ba khiah, bad kaba thymmai na ka bynta baroh ki ‘riew tymmen, ba kin dap da ka jingkmen bad jingsngewhun.
U bah E. Tariang, District Social Welfare Officer (DSWO) jong ka South West Khasi Hills District, Mawkyrwat, u la pynpaw ba ki rangbah bad ki tymmen ki san ki la long rad bah jong ka imlang sahlang, da kaba kit ïa ki jingkitkhlieh kiba kongsan ban kyntiew ïa ka roi ka par bad ka roi ka par jong ki pateng kiba dang rit bad ki la don ka bynta ha kiba bun ki kam ba kongsan ha kaba hikai ïa ki longïing bad ban ïalam ïa ki samla ha ka imlang sahlang bad ha ka shnong ka thaw hi baroh kawei.
U la bynrap ruh ba ïa kane ka sngi ba kyrpang jong ki tymmen la rakhe ym tang ban burom ïa ki jingnoh synñiang jong ki tymmen hynrei ban pynïar ruh ïa ka jingkyrshan lyngba ki jingthmu kum ka CM Care, kaba ai jingïarap pisa sha ki nongshong shnong kiba la tymmen kiba la palat 60 snem kiba don hapoh u laiñ jingduk. U la pynpaw ruh ïa ka jingpynbiang ïa ki jingsumar kiba lah ban ïoh bad kiba rem dor kiba la pynbeit kyrpang katkum ki jingdonkam jong ki tymmen bad ruh ban pynthikna ba ki tymmen kin ïoh burom, kheiñ kor, bad lait na ka jingshah lehbeiñ katkum ka rta, ban kyntiew ïa ka jingïaryngkat bad ka jingpynrung lang ha ka imlang sahlang.
Ha kane ka jingrakhe ïa ka sngi kyrpang jong ki ‘riew tymmen la ïoh ruh ka jingsam ïa ki jingaisngewbha da ki dur sah kynmaw ne momentous sha ki ar ngut ki ‘riew tymmen kiba la kynjoh ïa ka 90 snem karta kata sha ka Mei-ieit Rosina Syiemlieh na ka Shnong Photjaud-Rangthong bad ka Mei-ieit Biolis Thongni na ka Shnong Thiepdiengngan bad kumjuh ruh ka jingaisngewbha da ki kombor sha baroh ki ‘riew tymmen kiba la wan sha ka jingïalang.
Kiwei de kiba la donlang ha kane ka prokram ki long ka Dr. M. Iawphniaw, Medical Officer, I/C Rangthong PHC, u bah Kitborlang Nongrem, Myntri Shnong Rangthong ha ryngkat ki tymmen ki san kiba la shah khot sngewbha.