Nongpoh, Jymmang 20: Ka skul St. Joseph Higher Secondary School Umden mynta ka sngi hapdeng ka jingiphuh iphieng kala pynkup burom ïa u MLA ka Nongpoh u Bah Mayral Born Syiem hadien ka jingjop donburom jong u sa shisien ban shimti biang kum u MLA ba pura ka Nongpoh Constituency.
Ha katei ka jingpunkup burom la don ryngkat da u Fr. Glorious Syiemlieh Parish Priest ka Umden Parish, Fr Joachim Ekka Principal ka St. Joseph HSS, ki riew rangbah naka thaiñ Umden, ki nonghikai lem bad ki khynnah skul kiba la shim bynta ruh haki prokram bad ki jingshad bapher bapher.
Kum ban shu pynpaw ba katei ka skul ka dei ruh kaba la pynheh pynsan ïa u Bah Mayral Born Syiem uba la pule ruh naduh ba u dang rit haduh ka class VI ban bteng pat ïaki jingpule ba kham shalor sha kiwei pat ki skul, bad dei namar kata ka daw ba kum ka skul kaba la pynmih ïa u soh ban long kum u nongmihkhmat ka dap da ka jingsngewsarong halor ka jingjop don burom jong u Bah Mayral Born Syiem kum u MLA bala pynlong ïakatei ka skul ban sngew sarong bad pyndon burom ïa u haka jingïalang kaba shong mynta ka sngi ha madan jong katei ka skul.
Naka liang u Fr. Glorious Syiemlieh ba dei ruh u Parish Priest ka Umden Parish u la pynpaw ka jingsngewkmen bad kum ka skul kala ap khmih lynti ïa kaba kum katei ka sngi, ban ioh pyndon burom ïa u MLA u ba dei ruh u soh jong katei ka skul.
U la ong ruh ba bun naki paidbah kila ud ïa u surok Nongpoh Umden halor ka jingsniew bad jot rathai hynrei kum u MLA u la trei shibun ki kam ban kyntiew ïaka dong ka thaiñ, watla ka jingïaleh ban pynioh ïa u surok Umden ka dang ïaid shaid shaid, khamtam kum u MLA u la trei shitom ruh ban kyntiew ïaka pule ka puthi kaba dei ka jingdonkam ba hakhmat jong ki khynnah pule ha kane ka juk ba mynta ryngkat ki jingkyrpad ruh ba un dang trei bad shakri kham bha ïaka dong ka thaiñ.
U Bah Mayral Born Syiem haba kren ha katei ka sngi u la pynpaw ka jingsngewkmen kaba khraw hadien ba um shym poi pyrkhat ba katei ka skul kan leh burom kyrpang ïa u halor ka jingjop donburom jong u ha kane ka elekshon kaba la dep bad kum u MLA u la kular ban ai ka jingshakri kaba kham bha ban trei shitom naka bynta ka jingmyntoi jong ki paidbah ka dong ka thaiñ.
U la pynpaw ruh ba katei ka skul kala sdang ban kiew arsut ha baroh ki liang naduh ka pule ka puthi ka kam ïalehkai sports, ban long ruh kum kawei naki skul ba paw ha katei ka thaiñ Umden da kaba kyntu ruh ïaki khynnah skul ba kin pyndonkam hok ïaka sap bad ka jingstad kaba ki don, khnang ba ka umsyep ki kmie ki kpa kan nym sepei bad lehnohei, hynrei ban long ki khynnah kiba don ïaka thong haka jingim ka jong ki khnang ba ki poi sha ka kliar lum jong ka nam.
Naka liang u MLA u la ai ruh ka jingkhublei ba kyrpang bad ka jingsngewnguh shikatdei ïaka skul St. Joseph kaba la shim ïa katei ka sienjam ban pynkup burom ïa u kum u MLA ryngkat ka jingkyrmen ban ïatrei ryngkat ryngkat bad katei ka skul ban kyntiew ïaka pule ka puthi bad ki jingdonkam baroh, u la bynrap.
