Pynkup burom ka skul Friendly Academy HSS ïa ki samla pule

Nongpoh, Nailur 18: Shibynta ban ai mynsiem ïaki samla pule kiba pass bha haka eksamin HSSLC, ba kin long ka nuksa bad ban ai mynsiem ïaki ba kin nang leh bha shuh shuh haki jingpule ba kham shalor, ki bor pynïaid jong ka skul Friendly Academy Higher Secondary School, umpyrdong mynta ka sngi kala pynkup burom ïa 9 ngut ki samla pule kiba la pyndep bad pass bha haka eksamin HSSLC ba dang shu dep.
Ha katei ka sngi ka jingpynkup burom ïaki samla pule, u Bah Mayralborn Syiem MLA ka Nongpoh u la long kum u kongsan haka jingdon ryngkat ka Principal jong ka skul, ka kong S. Shylla, ki nonghikai, ki kmie ki kpa lem bad ki khynnah skul.
Haba kren ha katei ka sngi naka liang u Bah Mayral Born Syiem u la kdew shibun ki jingeh ba ki skul ki ïakynduh khamtam haki thaiñ nongkyndong khamtam haki lad jingïarap hynrei u la pynpaw ka jingsngewkmen kaba khraw halor ka jinglah jong kane ka skul ban pyndep ïaka thong bad ban kyntiew ïaka pule ka puthi.
U la ai jingïaroh ruh ïa katei ka skul namar bun naki nonghikai ba hikai ki dei hi ki khynnah ba pass na katei ka skul bad kane ka long ka nuksa ba bha ba ki khynnah pule bala pyndep na katei skul kim shym la phet sha kiwei ki jaka hynrei ki wan ban trei bad ban kyntiew ïa katei ka skul.
Shuh shuh naka liang u MLA ha katei ka sngi u la ioh ruh ban aiti ïaka Work Order kaba T.2 lakh lyngba ka skhim SRWP sha katei ka skul ba kin dang lah ban pynbha bad ban pynheh ïaki kamra klas naka bynta ka jingmyntoi jong ki samla pule katei ka skul.