Jowai, Naitung, 28: Ka Education Committee ka shnong Panaliar Jowai, kawei na ki komiti kaba pynïaid ïa ka skul jong ka shnong, ha ka sngi Saitjaiñ ka la pynkup burom ïa ki khynnah kiba pas ïa ka eksamin SSLC na Panaliar Secondary School Jowai, naduh u snem 2021 haduh 2025.
Ha kane ka sngi la sakhi lang da u MLA ka Jowai Constituency u Bah Wailadmiki Shylla uba la long kum u Kongsan, u Deputy CEM jong ka JHADC u Bah Lasky Rymbai kum u symbud kongsan, u Chairman ka komiti Bah Sienmitre Sumer, , ka Kong Hamya Shylla bad Bah Ikwol Sumer, u Bah Barlee Moore Shilla, Vice Chairman ka Education Committee, ka Headmistress jong ka Panaliar Secondary School Jowai ka Kong Dabunki Sumer bad kiwei kiwei.
Ha ka jingkren u Kongsan, u Bah Wailadmiki Shylla ul a ai ka jingïaroh ïa ka rukom pynïaid kam ka shnong ka Panaliar, kaba don shibun ki komiti ban pynïaid kam ha kajuh kapor ka plie lad ïa ki khun jong ka shnong ban ïashim bynta ban trei kam hapoh ka shnong ka thaw.
U la ïaroh ïa u Waheh Chnong u Bah Riquoma da kaba ong ba u dei u brïew bastad ban pynïaid ïa ki kam, namarba ula ïohsngew ha kiba bun ki bynta ba u pawkhmat ha ki kam babha bad ka kyrteng ka shnong ruh ka paw. Kum u Nongmihkhmat, u kular ban donlang bad ka shnong ryngkat ryngkat.
Ha kaba ïadei bad ka pule puthi, u la ong ‘haoid ngi la ïohi ba ka la kïew, tangba sngewsih pat ban ïohi ba ka jylla jong ngi, ka dang duna palat ïa kiba pass IAS, IPS bad kiwei ki kyrdan baheh ha ki tnat treikam bapher bapher’.
U la kyntu ïa ki khynnah skul ba kin minot ban poi sha ka thong, da kaba kyntu jur, ‘ba kim dei ban ïaknieh tang ïa kajuh ka kam bad ynda la duh, phin ong, ngim ïoh kam ïohjam. Shibun ki kam ki jam kiba ka Sorkar ka plie lad plie lynti, katkum ka sap ka phong ba phi don, ym dei ban shah pynbor ha kiwei ïa ka pule ka jong phi, phi dei ban sngewthuh dalade ïalade ban jop ïa kaba la thrang’ da kaba u ai nuksa na ka Dr. Wa-isa kaba la pyndep ïa ka kyrdan Ph.D.
U Deputy CEM ka JHADC, Bah Lasky Rymbai haba kren kum u symbud kongsan, ula ong ba ka jingstad ha ka pule ka dangle ka lah ban wanrah ïa ka jingkylla ha ka imlang ka sahlang bad ka lah ruh ban pynkylla dur ïa ka lawei ka Ri. U la ong shuh shuh ba ym dei tang ban ïoh ka jingnang jingstad ka lah biang hynrei kaba donkam tam ka dei ka akor ka burom, kaba pynitynnad bad pynbhabrïew ïa u brïew ne ka brïew bad ka ïing ka sem hi baroh kawei.
U la ai ka jingïaroh ïa ka Education Committee jong ka skul hapoh ka jingïalam u paralok jong u naduh ki por ba dang shong skul, u Bah Kyllimot.
Ka Kong Dabunki Sumer ka la batai lyngkot shaphang ka histori naduh ba la sdang ïa ka Secondary Section.
La batai bniah shaphang ka skul naduh Lower Primary da ka Kong Dr. Wa Isa Sumer, kaba long ruh ha kajuh ka por ka dkhot jong ka komiti. Ka Kong Isa, ka la ai mynsiem ïa ki khynnah skul ba kin nangjam shaphrang ha ka pule ka jong ki bad ka la ai nuksa ruh dalade kum kawei na ki khynnah pule jong ka skul ba ka la lah ban pyndep ïa ka kyrdan Ph.D. ka la kyntu ïa ki khynnah skul ban ym duh jingkyrmen lada ki trei shitom.
U Waheh Chnong ka Shnong Panaliar, Bah Riquoma Rq. Laloo, haba kren ha kane ka sngi u la ai ka jingïaroh ïa ka Education Committee kaba la lah ban pyndep ïa kane ka kam ba la sahteng naduh u snem 2021.
U la ong, ba ka jingpas bha jong ki khynnah skul, ka dei kawei na ka jingtrei shitom ki kmie ki kpa bad ki nonghikai. Bunsien ki nonghikai kim ju ïoh ïaroh haba pas bha ki khynnah, tangba ki shah beiñ pynban ynda la phiel ki khynnah. Kumta ban ïoh ïa u soh babha ha baroh ki liang, ka donkam ïa ka jingïatreilang baroh, ki khynnah skul, ki kmie ki kpa ryngkat ki honghikai, ong u Waheh Chnong.
