Nongpoh, Naitung 13: Da ka mynsiem jong ka jingsarong bad ka jingkmen, ka Dorbar Shnong Nongsder hynnin ka janmiet jong ka Sngi Thohdieng, ka la pynkup burom ïa u Dr. Ricky AJ Syngkon, kaba dei hadien ba u la shah jied kum u MP ka jylla bad halor ka Nongrim ruh ka jingsarong ïa ka shnong, ba u Dr. Ricky AJ Syngkon u dei ruh u nongshong shnong ka Shnong Nongsder.
Ha kane ka sngi, na ka liang ka Dorbar Shnong Nongsder, ka la pynkup burom ruh ïa ki ar ngut ki Longkmie, kiba la paw ha ka kam ïalehkai sport ba kynthup ïa ka Kong Kmoin Wahlang bad ka Kong Wandashisha Dewkhait, kiba la wan rah ïa ka jingjop na ka 1st Pan India Federation Cup National Masters Games-2024 kaba la long ha Telangana. Kine ki ar ngut ki Longkmie kin sa leit ruh ban mihkhmat ïa ka ri India sha ka 13th Pan Pacific Masters Games-2024 in Gold Coast, Queensland, Australia ka ban sa long ha bnai Naiwieng 2024.
Ha kane ka jingpynkup burom, la don lang ruh naduh u Rangbah Shnong ka Shnong Nongsder, u Bah Jonas Lyndem, u Secretary Shnong u Bah F. Sohkhlet, u Bah W. Shangpliang, rangbah shnonng barim bad kynthup naduh ki longkmie, ki longkpa, ki khun samla bad ki paidbah nongshong shnong ka Shnong Nongsder.
Haba ai jingkren ha kane ka sngi, na ka liang u Dr. Ricky AJ Syngkon, u la ai khublei kyrpang ïa ka Dorbar Shnong Nongsder, kiba la pynkup burom ïa u, kum u MP ba thymmai ba la jied da ki paidbah bad ruh kum u Nongshong shnong ka Shnong Nongsder. U la ai khublei kyrpang ruh ïa ka Dorbar Shnong, kiba la pynkup burom ruh ïa ki 2 ngut ki Longkmie, kiba la paw ha ka jingïalehkai sport bad ruh u la ai ka jingkitbok kitrwiang ïa kitei ki Longkmie ki ban mihkhmat ïa ka ri India sha ka 13th Pan Pacific Masters Games-2024 in Gold Coast, Queensland, Australia ka ban sa long ha bnai Naiwieng 2024.
Shuh shuh, u la pynpaw ruh ba kum u MP ba la jied da ki paidbah un sa kren ïa kino kino ki mat ki jura jong ka jylla bad u pan ruh ka jingkyrshan na ki paidbah ba don kata ka jingïatrei lang, khnang ba kum u MP ka jylla un lah ban rah ïa kino kino ki mat jong ka jylla sha ka sorkar pdeng bad u kular ruh ban kren ïa kino kino ki jingangnud u paidbah ka jylla sha ka sorkar pdeng.
