Pynkup burom ka Seiñ Kur Dkhar Wapung Circle ïa kiba pass bha ha ki exam bad la thung ïa ka Seiñ Kur Dkhar Wapung Shnong Unit

Khliehriat Nohprah 20: Ka Seiñ Kur Dkhar Wapung Circle, myn ha ka 17 tarik mynta u bnai nohprah ka la pynlong ïa ka prokram pynkup burom ïa ki samla pule jong ka kur kiba la pass bha ha ki exam bapher bapher ba kynthup ruh ki profesional course bad ki vocational cource, kumjuh ruh ïa kito kiba la trei bha ha ki kam bapher bapher kiba long kum ka jingaimynsiem bad pynshlur ïa kiwei pat.
La ong ïa kane ka prokram la pynlong kum shi bynta ban ïa ithuh ithaw iwei ïa iwei pat kum shi kur shi jait bad ban pynshlur ïa ki khun samla ba kin nang kiew shaphrang ha ki jingpule ha ki kyrdan bapher bapher.
Haba kren ha ka jingïalang, u President jong ka Seiñ Kur Dkhar Wapung Circle, u bah Shaniahskhem Dkhar, u la ai ïa ka jingkren mait phang u la ong ba ka thong kaba ha khmat eh jong u naduh ka por ba u bat kum u President jong ka Seiñ kur Wapung Circle, ka long ban leh ïa kano kano kam ka ban long kum ka jingpynshlur ïa ki khun samla jong ka Seiñ kur Dkhar Wapung Circle khamtam eh ha ka pule ka puthi kaba long ka lawei jong ki samla.
Kiba la ai jingkren ki kynthup ruh, u President jong ka Seiñ Kur Dkhar East Jaiñtia Hills District, u bah Teras Dkhar, u General Secretary jong ka Seiñ Kur Dkhar Wapung Circle, u bah Kyrshan Dkhar, u Ad General Secretary, u bah M .H Dkhar, u bah Justine Dkhar (Ex-MLA), uba long kum u Adviser; ka kong Rosila Dkhar, u Kermi Dkhar, kiba dei ki dkhot executive jong ka Seiñ kur, u bah Jessi Dkhar, President, Seiñ Kur Dkhar, Khliehtyrshi Circle, kiba la ai ïa ki jing kren sneng bad kyntu ïa ki kur ki jait ba kin don ka mynsiem ban ïa jan ban ïa ieid ban ïarap mar kylliang, ban iatylli shi kur shi jait la ha kano kano ka bynta, ban im ka jingim tip briew tip Blei, ban long kiba don akor, don burom ban don ruh ka mynsiem sngew nguh, ki la kyntu kyrpang ïa ki khun samla kiba don ha ki jingpule ba kin long kiba trei shitom, kiba minot thop, kiba kongnguh sneng ïa ki kmie ki kpa, ïa ki nonghikai bad ïa kiba halor.
Ha kane ka sngi, ka Seiñ Kur Dkhar Wapung Circle, ka la ïoh ruh ban thung ïa kawei ka tnat treikam ha shnong Wapung, ka ‘Seiñ Kur Dkhar-Wapung Shnong Unit’ ha kaba la pynskhem ruh ïa ki nongkitkam kiba kynthup, u President, u bah Seibormi Dkhar; Vice President, u bah Kalat Dkhar, General Secretary, u bah Jointly Dkhar; Asstt. Genl. Secy, u bah Romi Dkhar, Treasurer, ka kong Manti Dkhar bad ka kong Neiniwan Dkhar bad ka Adviser ka kong Thiangmon Dkha lem bad ki dkhot ba kynthup u bah Kyrshan Dkhar, u Yukless Dkhar, ka Pretty Dkhar, ka Joplangki Dkhar lem bad 31 ngut ki dkhot Executive, ïa kiteti ki nongkitkam bad ki dkhot la pynbam smai bad pynskhem da u bah Harwis Dkhar, uba dei u President jong ka Seiñ Kur Dkhar Central Body.