Shillong, Naitung, 03: Ka Seiñ Jaintia Women’s Wing, Shillong hynne ka sngi ka la pynlong ïa ka jingpynkup burom kyrpang ïa ki saw ngut ki longkmie Pnar kiba la paw shakmat ha ki kam shakri ïa ka imlang sahlang. Kine ki longkmie kiba la shah pynkup burom ki kynthup ïa ka Kong Rebecca Suchiang, IAS kaba dei ruh ka Chief Secretary kynthei kaba nyngkong eh ha ka ri, ka Kong Isawanda Laloo, IAS kaba dei ka Deputy Commissioner jong ka East Khasi Hills, ka Kong Trinity Sayoo ka nongrep ïa u shynrai Lakadong kaba la ïoh ruh ïa ka Padmashree Award ha u snem 2021, ka Kong Minimon Laloo ka nongthoh kot ba la ïoh ïa kiba bun ki khusnam kum ka Women of the Year ha u snem 2021 bad kiwei pat ki khusnam ha ka jylla bad ha ka ri. La pynkup burom ïa kine ki longkmie da u kongsan u Bah Sanbor Shullai uba dei u Myntri jong ka sorkar jylla.
Haba kren ha kane ka sngi u Bah Sanbor Shullai u la ai ka jingïaroh kyrpang ïa kine ki longkmie kiba la lah ban wanrah ïa ka nam ïa ki nong Jaintia bad ïa ka jylla hi baroh kawei da kaba kyntu ruh ïa ki samla ban shim ïa ka jingtrei shitom jong ki kum ka nongmuna ha ka jingim jong ki. U Bah Sanbor ha ka jingkren jong u la kyntu kyrpang eh ïa ki nongjaintia baroh kiba shong ba sah ha Shillong ba kin don ka jingieid kyrpang ïa la ka ktien ka thylliej, ka riam ka beit, ka put ka tem tynrai jong ki bad bad sarong ruh ïa la ka thymmei ka tynrai lajong. Shuh shuh u la kyntu ruh ba ka rukom spel ïa ka jait kaba bun ki la pynkylla da kaba ai nuksa kum ka jait Shullai la pynkylla thymmai sha ka Chullai, Shallam sha Challam kaba lah ban wanrah pat ïa ka jingkulmar ha ka jingïadei kur.
Ha ka jingkren jong ka ka Kong Rebecca V Suchiang ka la ai ka jingïaroh kyrpang eh ïa ka Kong Trinity Sayoo kaba la hikai lem ïa ki para nongrep lyngba ka SHG ïa ka rukom rep kaba kham janai ïa u shynrai Lakadong uba wat ka sorkar ruh ka don da ka mission kyrpang ïa ka jingrep ïa une u jingthung. Shuh shuh ka Kong Rebecca ka la kyntu ruh ïa ki nongjaintia ba kin trei shitom ha ki kam kaba ki trei khnang ba ka jingtrei shitom jong ki kam long ka jingmyntoi ïa ka jylla bad ïa ka ri hi baroh kawei.
Haba ai jingkren hadien ba la dep ka jingpynkup burom ka Kong Trinity Sayoo ka la pynpaw ïa ka jingsngew kmen ïa ki kyntien kitbok eh daw kiba ki ai ha ka Citation. Shuh shuh la la ai burom ruh ïa u synïang u bynhei uba ka seng ka la noh sha ka jaidbynriew ha ki snem kiba la dep da kaba kitbok ruh ba kan nang lah ban nang bteng ha ki sngi kiban dang wan.
Ka Kong Isawanda Laloo pat ha ka jingkren jong ka ka la ban jur ïa ki samla na rilum Pnar bad kumjuh ruh ïa ka jaidbynriew hi ban long kiba trei shitom ha kano kano ka kam kaba ki leh. Shuh shuh ka la kyntu ïa ki samla ka jaidbynriew kiba kwah ban shakri ïa ka jaidbynriew ha ki kam Civil Service ba kin trei shitom khlem man thait noh namar ban pas ïa ka eksamin ban ïoh shakri ha kane ka kam donkam ka jingkut jingmut ha lade. Ka Kong Isawanda ka la ong ruh ba kum ka jaidbynriew ka donkam eh ba ngin ïoh ïa ki IAS trai muluk kiban shakri ïa u paidbah jong ka jylla. Shuh shuh ka Kong Isawanda ka ai burom kyrpang eh ïa ka Chief Secretary ka jylla ka Kong Rebecca V Suchiang kaba long kum ka nongmuna naduh ka por kaba ka dang rit mynba ka la buh jingmut ha lade ban pass ïa ka eksamin ban long IAS.
Kum ka longkmie kaba la ïoh la jingithuh kyrpang ïa ki kam jong ka ka Kong Minimon Laloo ka ai ai ka khubor ba ha ka lynti sha ka thong dei tang ka jingtrei shitom kaban pynpoi sha ka thong ym da kiwei pat ki lad. Ka Kong Minimon ka kyntu jur ïa ki samla ba kin ieid la ka Ktien bad ban kylluid jingmut ruh ban tip ïa ka jong kiwei pat ki jaidbynriew.
