Shillong, Naitung, 27: Ka St Anthony’s College, Shillong ha ka sngi Saitjaiñ ka 23 tarik ka la pynlong ia ka jingsam syrnot sha ki samla pule jong ka kiba la pyndep ia ka jingpule ha ka kyrdan graduate bad ka jingpynkup burom kyrpang ia ki samla kiba wan shakhmat ha ka eksamin kaba la pynlong da ka North Eastern Hills University.
Ha kane ka sngi la sam ia ki khusnam sha 123 ngut kiki samla pule kiba wan shakmat ha ka eksamin bad kiba ioh bat ha ki kyrdan kiba sha khmat(rank holder) bad ka jingsam ruh ia ka khusnam kaba da ka song pisa kiba la ainam ha ki nonghikai bad ki nongnoh synïang ha kaban pynwan dur ia kane ka jaka pule ryngkat ki syrnot sah kynmaw kiba sha kito ki samla kiba bat ia ka kyrdan kaba ha khmat eh jong ka eksamin.
Ka kolej ka la pynkup burom ruh ia ki nonghikai kiba la pyndep ia ka kyrdan Ph.D bad kiba la ioh ka jingituh kyrpang na ka jingnoh synïang sha ki journal kiba pher bapher ha ka ri bad ka pyrthei.
Ïa kane ka jingpynkup burom bad ka jingsam ia ki syrnot sha ki samla ba la pas na kane ka jaka pule la wan shim bynta da u Bah Aiban Swer Director jong ka Meghalaya Basin Development Authority(MBDA) kum u Kongsan.
