Shillong, ïaïong 19: Ka Rotary Club of Orchid City Shillong, mynta ka sngi ka la pynkup burom da ka Rotary Vocational Excellence Award 2021 – 2022 sha ki saw ngut ki briew kiba la trei borbah ban wanrah ka bha ka miat ka imlang sahlang ha ka jylla.
ïa kane ka jingpynlup burom ba la pynlong ha Raj Bhavan Shillong la pynkup burom da u Lat ka jylla, u Satya Pal Malik sha u Bah Hockey Kharumnuid, uba la ai ka jingshakri kumba laiphew snem na ka bynta ban peit ïa ka jingaid beit ki kali ha Mawlai Phudmuri (Stand Bus). Nangta sha u Bah Nicholas J Kharnami, namar ka jingtrei ba khlem shongthait jong u ha kaba pynsngewthuh ïa ki briew halor ka jingkhuid jingsuba bad ka jingsumar mariang. Uwei pat uba la shah pynkup burom u long u Dr Bhaskar Borgohain, uba la ai ka jingshakri ha liang ka koit ka khiah bad kumjuh ruh ïa i Kong Shidalin Marbaniang, iba long ka kynthei kaba nyngkong eh ban pynmih ïa ki napkin ha ka jylla.
U Lat u la ai jingïaroh ïa kane ka Club, kaba la ju trei radbah na ka bynta ban ithuh bad kyntiew ïa ki briew kiba ai ka jingshakri ïa ka imlang sahlang. Ha kajuh ka por u la ai jingïaroh ruh ïa kine ki saw ngut namar ka jingtrei ba radbah jong ki.
