Nongpoh, Jymmang 04: Ka Ri Bhoi Synod College kaba don ha Umsaitsning ha Ri Bhoi mynta ka sngi ka la lah ban pynkup burom noh ïa ki 18 ngut ki samla pule ba nyngkong eh jong katei ka College naduh ba la seng ha u snem 2017 nalor ki ar ngut ki samla pule kiba la pas bha ha ka HSSLC examination.
Na ka liang ki bor pynïaid ka Ri Bhoi Synod College ki la shim ïa kane ka sienjam ban pynkup burom ïa kitei ki 18 ngut ki samla pule ba nyngkong eh jong katei ka College, ka dei hadien ba kine ki samla ki la pyndep ïa ka jingpule na katei ka College ba kum ki bor pynïaid ka College ki sngew burom ba ki dei ki samla pule ba nyngkong eh jong katei ka College.
Ha kaba pynkup burom ïa kitei ki samla la wan shim bynta da u MP ka Lok Sabha, u Ma Vincent H. Pala kum u symbut kongsan uba la wan ruh ban plie ha ka por ba plie nynmong ïa katei ka College ha u snem 2017 bad la don ryngkat ruh u MLA barim ka Umsning, u Dr. Celestine Lyngdoh, u Bah Charles Marngar, MDC ka Mawhati, u Rev. H.L Myrsing, President ka Governing Body, u Dr. Kamilang Nongmalieh, Vice Principal bad kynthup ki samla pule bad ki nonghikai katei ka college.
Kum ban pynkymmaw, ka Ri Bhoi Presbyterian Synod ka la seng ïa kane ka College ha u snem 2017 da ka jingthmu phai khmat sha ki samla pule khamtam haRi Bhoi ki ba wan na ka longing kiba duna ka jingioh jingkot ba kin ioh ban bteng ïaka jingpule jong ki bad kumjuh ruh ban dang kyntiew ïa ka pule ka puthi ki khun samla ha ka dong Ri Bhoi bad ka jylla hi baroh kawei.
Haba kren ruh ha kane ka sngi kum u kongsan, u MP ka Lok Sabha, u Ma Vincent H. Pala u la ai ka jingkhublei kaba kyrpang ïa ka Ri Bhoi Presbyterian Synod ha kaba wat hapdeng shibun ki jingeh ba ki ïa kynduh bad ki la lah ban seng ïa kane ka College kaba la ai ka jingmyntoi na ka bynta ki khun samla ka dong Ri Bhoi.
U la ong ruh ba ka jingdon kane ka College ka la plie lad plie lynti ruh ïa ki khun samla kiba ym kot bor ban leit pule sha ki College kiba la kham paw bad kyrmen skhem ba kane ka College kan dang lah ban trei shitom bad ban dang pynmih shibun ki samla kiba don kata ka jingkitkhlieh ïa ka imlang ka sahlang hadien ba ki la pyndep ïa ka jingpule ne ba ki la ioh pdaing ha ka jingim ïa kata ka jingnang jingstad.
Shuh shuh, kum u nongmihkhmat paidbah u la kular ruh ban dang ai ka jingïatrei lang bad ban thaw ruh ki lad ki lynti na ka bynta ban dang kyntiew ïa kane ka College bad u khmih lynti ruh ba kane ka College kan sei shibun ki khun samla kiba don ka jingkitkhlieh na ka bynta ban kyntiew ïa ka ri bad ka jaid bynriew.
