Nongpoh, Nailar 29: Shibynta ban ai mynsiem bad pynshlur ïaki samla pule jong ka Ri Bhoi College ba kin nang phyrnai bad tyngshaiñ haki jingpule ba kham shalor, ki bor pynïaid jong ka Ri Bhoi College mynta ka sngi kila pynkup burom ïa kumba 325 ngut ki samla pule kiba la pyndep ïaka Graduate haka Arts bad Commerce Stream kynthup ïa 69 ngut ki samla ba wan haka 1st division.
Ha katei ka sngi da ka jingsarong ka Ri Bhoi College kala pynkup burom ruh ïaka samla Daphira Khymdeit kaba la ioh ïaka kyrdan ba nyngkong haka eksamin bala pynlong da ka NEHU haka subject Education.
La sakhi ruh ha katei ka sngi da ka jingdonlang u Bah Mayral Born Syiem MLA kum u kongsan, u Bah SSR Bamon Principal ka Ri Bhoi College ki nonghikai lem bad ki samla pule kiba la shah pynkup burom.
Haba kren ha katei ka sngi kum u kongsan u Bah Mayral Born Syiem u la pynpaw ka jingsngewkmen kaba khraw ban iohi ba ki samla pule ka Ri-Bhoi College kila sdang ban kiew shaphrang haka liang ka pule puthi kumba la sakhi ruh ba ki don ki samla kiba la wan shakhmat haka eksamin ba pynlong da ka NEHU.
