Nongpoh, Naiwieng, 14: Ban ai mynsiem bad pynshlur ïa kito ki samla kiba la leh bha ha ka SSLC bad HSSLC examination jong u snem 2025 na Ri Bhoi District, ka Ri Bhoi Youth Federation Sengkmie mynta ka sngi ka la pynkup burom haduh 28 ngut kitei ki samla kiba la wan rah nam wan rah burom ïa ka Ri Bhoi da kaba ki la pas bha ha kitei ki examination ba la pynlong da ka MBOSE.
Ïa kane ka jingpynkup burom la pynlong ha Conference hall ka RBYF ha Saiden, ha kaba la wan ban shim bynta da u Myntri sorkar ba peit ïa ka tnad C& RD u Bah Sosthenes Sohtun kum u kongsan bad la sakhi lang ruh da ka jingdon lang u President ba rangbah ka RBYF u Bah Bipul Thangkhiew, u Education Secretary u Bah Skhembor Marbah, u Working President u Bah Liander Nongshli, u Adviser ka RBYF u Bah Augustine Sten, Political Secretary u Bah RJ Thangkhiew, u Finance Secretary u Bah Balawantip por marwein lem bad kiwei ki nongïalam nalor kitei ki samla pule, ki nonghikai bad ki kmie ki kpa jong ki.
Haba kren ha kane ka sngi kum u kongsan, u Bah Sosthenes Sohtun u la ai ka jingïaroh kaba khraw ïa ka seng RBYF kaba la pynlong ïa kane ka prokram pynkup burom ïa ki samla pule, namar kane ka jingpynkup burom kam dei tang ba ka pynshlur ïa kitei ki samla kiba la pass bha bad ka pynshlur ruh ïa kiwei ki khun samla ba kin dang lah ba leh bha ha ki jingpule ba ka Ri Bhoi District ka dang donkam shibun ki samla kiba la biang ha ka kyrdan pule ban shakri bad ban saiñdur na ka bynta ka bha ka mait bad ka roi ka par jong ka District hi baroh kawei.
Kum u Myntri sorkar ba mihkhmat na Ri Bhoi District u Bah Sosthenes Sohtun ha kane ka sngi u la kular ruh ban ai ka jingïatrei lang bad ka seng RBYF ym tang ha kaba kyntiew ïa ka pule ka puthi ne ka jingnang jingstad, hynrei ban ïa trei lang na ka bynta ban kyntiew ïa ka bha ka miat bad ka roi ka par jong ki paidbah ha Ri Bhoi District.
Haba kren ruh ha kane ka sngi na ka liang u President ka RBYF u Bah Bipul Thangkhiew, u la ong ba ka daw kaba la pynlong ïa ka seng RBYF ban pynlong ïa kane ka jingpynkup burom, ka dei ka thong jong ka RBYF ban kyntiew ïa ki khun samla ka District ba kin kiew shaphrang ha ki jingpule bapher bapher.
U la ong ruh ba ka RBYF ka la shim ruh ïa kane ka sianjam ban pynkup burom la bun tylli ki snem bad ka dei ruh ka thong ban pynshlur ïa baroh ki samla ba kim dei ban sangeh noh ïa ka jingpule tang shiteng por, hynrei ba kin pule sha duh ki kyrdan kiba shaneng namar ka seng ka angnud ban mih kita ki samla kiba la biang pura ha ka kyrdan pule ba kin kit kin bah lem ïa ka lyngkor nongïalam na ka bynta ban kyntiew ïa ka Ri Bhoi District bad ïa ka jylla hi baroh kawei, u la bynrap.
