Pynkup burom ka RBYF ïa ka Samla Lasara, aiti 50 tylli ki shuki sha ka skul Persara Secondary

Nongpoh, Ïaiong 10: Ka RBYF Lum Umpih Unit mynta ka sngi ka la pynkup burom ïa ka samla Lasarapynbiang Nongbri, kaba la wanrah ïa ka nam bad burom ym tang ïa ka ïing ka sem hynrei ïa ka shnong ka thaw bad ka dong Ri-Bhoi hi baroh kawei, hadien ba ka la leh bha ha ka eksamin SSLC bad rung ha ka kyrdan ba 8 jong ka Top 20 da kaba khur 568 marks.
Ka Lasara, kaba dei na Lum Umpih, Umsning bad kaba pule ha St. Michael’s Higher Secondary School, ka la long ka nuksa kaba bha ïa kiwei pat ki samla pule ha ka thaiñ, namar ka jingtrei shitom bad jingïai minot jong ka ban poi sha kane ka kyrdan napdeng ki phew hajar ngut kiba ïakhun ha kane ka eksamin.
Halor kane ka jingjop, ka RBYF Lum Umpih Unit hapoh ka jingïalam u Samla Synshar Kurbah kum u President bad u Samla Mathew Suiam kum u General Secretary, ka la shim ïa ka sienjam ban pynkup burom ïa katei ka samla kum ka dak ka jingïaroh bad ai mynsiem halor ka jingjop jong ka.
Ha ka prokram pynkup burom la ïadonlang ruh ki nongïalam ka seng, kynthup u Samla Henry Marngar General Secretary ka Umsning Circle, u Samla Balakmen Nongbri Transport Secretary ka sengkmie, ryngkat ki nongïalam shnong, ki longkmie bad ki nonghikai skul.
Ha kajuh ka sngi, ka seng ka la aiti ruh kumba 50 tylli ki shuki sha ka skul Persara Secondary School kum ka jingïarap kaba rit hynrei kaba donkam eh na ka bynta ka jingdonkam jong ka skul.
Ki nongïalam ka RBYF ki la pynpaw ka jingsngewkmen kaba khraw halor ka jingjop jong ka Lasara bad ki la ai mynsiem ïa ka ban dang bteng shuh shuh ha ki jingpule ba kham shalor. Ki la kyntu ruh ïa kiwei pat ki samla ba kin trei shitom bad minot thop ban poi sha ki thong jong ki, bad ban siew kylliang ïa ka jingïarap bad jingïai shah jong ki kmie ki kpa da ka jingjop ha ka jingpule ryngkat ka akor ka burom.